ပို့လဘား၊ ဧပြီ ၅ ရက်၊ မူဆယ်
တရုတ်-မြန်မာနယ်စပ်ဖြစ်တဲ့ ရှမ်းမြောက် မူဆယ်မြို့မှာ စစ်ကောင်စီ လက်အောက်ခံ ပြည်သူ့စစ် အရာရှိတစ်ဦးက ထင်း ကောက်နေတဲ့ အမျိုးသားတစ်ဦးကို ဖမ်းဆီးရိုက်နှက်ခဲ့တယ်လို့ ဖြစ်စဉ်သိရှိသူ အမျိုးသားတစ်ဦးက ရွှေဖီမြေကို ပြောပါတယ်။
ဒီနေ့ ဧပြီ ၅ ရက် မနက် ၉ နာရီက မူဆယ်မြို့မှာ နေထိုင်တဲ့ အသက် ၄၈ နှစ်အရွယ် ဦးအိုက်ဝေါဝ်ဆိုတဲ့ အမျိုးသားတစ်ဦးဟာ စစ်တပ်ရဲ့ စစ်မှုထမ်း ရုံးဟောင်းနဲ့ ကြံ့ခိုင်ရေးရုံးအနီးမှာ ထင်း သွားကောက်တာပဲ ဖြစ်ပါတယ်။
“သူအဲမှာ ထင်းကောက်ဖို့ လုံခြုံရေး စောင့်နေတဲ့ ပြည်သူ့စစ်ဝင်တစ်ဦးဆီ ခွင့်တောင်းတယ်။ အဲဒီလုံခြုံရေး စောင့်ပေးတဲ့သူက ခွင့်ပြုလို့ သူက ထင်း သွားကောက်တာ။ သူတို့ရဲ့ အထက်လူကြီးတစ်ယောက်ရောက်လာပြီးတော့ သူ့ကို ဖမ်းထားပြီး ရိုက်နှက်တယ်။ ရင်ဘက်ကို ၅ ချက် ကန်တယ်။ မျက်နှာ ၄ ချက် ထိုးတယ်။ သေနတ်နဲ့လည်း ထုထောင်းတယ်။ လူကို မှောက်ခိုင်းပြီး ကြိုးတုပ်တယ်။ ဦးခေါင်းကို ၄ ချက် ရိုက်နှက်ပြီး ခြုံထဲမှာ ပစ်ထားလိုက်တယ်။ သူအခုလမ်းတောင် မလျှောက်နိုင်တော့ဘူး”
အဆိုပါ အမျိုးသားကို ပြည်သူ့စစ်အရာရှိတစ်ဦးက ၎င်းကို သတိလစ်သွားတဲ့အထိ ရိုက်နှက်ခဲ့တယ်လို့ ၎င်းအမျိုးသားက ပြောပါတယ်။
ရိုက်ခံရတဲ့ အမျိုးသားဟာ မူဆယ်မြို့မှာ နေထိုင်ပြီး ဝင်ငွေ ရဖို့အတွက် ထင်းတွေ လိုက်ကောက်နေတာဖြစ်တယ်လို့ ၎င်းက ဆက်ပြောပါတယ်။
ပြီးခဲ့တဲ့ ဧပြီ ၁ ရက်ကလည်း မူဆယ်မြို့ ဆင်ဖြူပေါက်ဂိတ်မှာ မူဆယ် လဝက အရာရှိတစ်ဦးက အသက် ၅၈ နှစ်အရွယ် အမျိုးသမီးတစ်ဦးကိုလည်း မူးလဲတဲ့အထိ ရိုက်နှက်ခဲ့ပါတယ်။
