ခိုင်လေး၊ မတ်လ ၁၉ ရက်၊ မူဆယ်
စစ်ကောင်စီတပ် ထိန်းချုပ်ထားတဲ့ ရှမ်းမြောက် မူဆယ်မြို့မှာ ပြည်သူ့စစ်အချင်းချင်းကြား ကားခိုးမှုဖြစ်ပွားပြီး ကားခိုးတဲ့ ပြည်သူ့စစ်နှစ်ဦးကို စစ်ကောင်စီတပ်နဲ့ လက်အောက်ခံပြည်သူ့စစ်တချို့က ဖမ်းဆီးရိုက်နှက်ခဲ့တယ်လို့ မူဆယ်မြို့ခံ အမျိုးသားတစ်ဦးက ရွှေဖီမြေကို ပြောပါတယ်။
ပြီးခဲ့တဲ့ မတ်လ ၁၇ ရက်နေ့တုန်းက မင်္ဂလာမူဆယ်အနီးမှာ ဖမ်းဆီးရိုက်နှက်ခံခဲ့ရတဲ့ ပြည်သူ့စစ် ၂ ဦးက ပြည်သူ့စစ်တပ်ဖွဲ့အရာရှိတစ်ဦးရဲ့ ဖုန်းနဲ့ကားကို ခိုးယူသွားတာ ဖြစ်ပါတယ်။
“သူတို့ အချင်းချင်းဘဲ။ ပြည်သူ့စစ် အရာရှိရဲ့ ဖုန်းနဲ့ကား ခိုးသွားတာ။ မနေ့က ခိုးတဲ့သူ နှစ်ယောက်ထဲက တစ်ယောက်ကို ပစ်သတ်လိုက်ပြီ။ နှစ်ယောက်လုံးအသက်က ငယ်သေးတယ်။ ၁၆၊ ၁၇ လောက်ဘဲရှိမယ် ထင်တယ်” လို့ မူဆယ်မြို့ခံ အမျိုးသားတစ်ဦးက ပြောပါတယ်။
ကားခိုးတယ်ဆိုတဲ့ ပြည်သူ့စစ်တပ်ဖွဲ့နှစ်ဦးဟာ မူဆယ်မြို့ထဲမှာ လှုပ်ရှားနေတဲ့ ဘယ်ပြည်သူ့စစ်တပ်ဖွဲ့အောက်က တပ်သားတွေဆိုတာတော့ မသိရဘူးလို့ နောက်ထပ်အခြေအနေ သိရှိသူတစ်ဦးက ပြောပါတယ်။
၎င်းက “ကားနဲ့ ဖုန်းပျောက်သွားတာ။ သူတို့(ပြည်သူ့စစ်)က လိုက်ရှာတော့ ကားဘဲတွေ့တာ။ တွေ့တဲ့ အချိန်တောင်မှ ကားနံပါတ်ပြောင်းထားပြီ”လို့ ပြောပါတယ်။
၁၀၂၇ စစ်ဆင်ရေးနောက်ပိုင်းမှာ ပြည်သူ့စစ်တပ်ဖွဲ့အများစုက မူဆယ်မြို့ထဲကို ပြောင်းရွေ့လာကြပြီး လက်ရှိ မူဆယ်မြို့မှာ စစ်ကောင်စီလက်အောက်ခံ ပြည်သူ့စစ်အဖွဲ့ပေါင်း (၃၀) ဝန်းကျင်ရှိနေတယ်လို့ သိရပါတယ်။
စစ်ကောင်စီတပ်ဖွဲ့နဲ့ ပြည်သူ့စစ်တပ်ဖွဲ့အများအပြားရှိနေတဲ့ မူဆယ်မြို့မှာ တရားဥပဒေစိုးမိုးရေး အားနည်းသလို အခုလို ပြည်သူ့စစ်အချင်းချင်း ပစ်ခတ်သတ်ဖြတ်တာတွေလည်း မကြာခဏဖြစ်ပွားလေ့ရှိပါတယ်။
