ပို့လဘား၊ ဩဂုတ် ၆ ရက်၊ လားရှိုး
စစ်ကောင်စီတပ် ပြန်လည်ထိန်းချုပ်ထားတဲ့ ရှမ်းမြောက် လားရှိုးမြို့မှာ စစ်ကောင်စီတပ်သားတစ်ဦး မိုင်း နင်းမိခဲ့တယ်လို့ ဒေသခံ အမျိုးသားတစ်ဦးက ရွှေဖီမြေကို ပြောပါတယ်။
လားရှိုးမြို့အထွက် မယ်ဟန်ဂိတ်အနီးက စစ်တပ်ဂိတ်မှာ ဒီနေ့ ဩဂုတ် ၆ ရက် မနက်အစောပိုင်းက စစ်ကောင်စီတပ်သားတစ်ဦး မိုင်းနင်းမိခဲ့ပြီး ဒဏ်ရာ ရရှိခဲ့တယ်လို့ ဆိုပါတယ်။
“ခမရ ၅၀၇ က စကစရဲ့လူ မိုင်း နင်းမိတာ။ အဲဘက်က အသံကြားတာနဲ့ တက္ကသိုလ်ရှေ့မှာလည်း ရဲကား ၂ စီးနဲ့ အင်အားအပြည့် တွေ့ရတယ်။ အဲဒါနဲ့ မြို့ထဲ လုံခြုံရေး တင်းကြပ်ရောဘဲ။ သူဘာလုပ်လို့ နင်းမိတာတော့ မသိရဘူး”
မိုင်းနင်းမိပြီး ဒဏ်ရာ ရသွားတဲ့ စစ်ကောင်စီတပ်သားရဲ့ နောက်ဆက်တွဲ အခြေအနေကိုတော့ မသိရသေးပါဘူး။
တရုတ်ရဲ့ ကြားဝင်စေ့စပ်မှုကြောင့် စစ်ကောင်စီနဲ့ MNDAA အကြား အပစ်ရပ်ဖို့ သဘောတူခဲ့ပြီးနောက် ကိုးကန့်တပ်ဟာ လားရှိုးမြို့ကနေ ပြီးခဲ့တဲ့ ဧပြီ ၂၁ ရက်က ထွက်ခွာခဲ့ရပြီး စစ်ကောင်စီရဲ့ အုပ်ချုပ်ရေးယန္တရား ဝင်ရောက် လည်ပတ်နေပါတယ်။
စစ်ကောင်စီရဲ့ အရှေ့မြောက်ပိုင်းတိုင်းစစ်ဌာနချုပ် အခြေစိုက်ရာ လားရှိုးမြို့ကို ကိုးကန့်တပ်နဲ့ တော်လှန်ရေးတပ်တွေက ပူပေါင်းပြီး ပြီးခဲ့တဲ့ ၂၀၂၄ ခုနှစ် ဩဂုတ် ၃ ရက်မှာ တိုက်ခိုက်သိမ်းပိုက်ခဲ့ပြီးနောက် ၈ လကျော် အကြာမှာ စစ်ကောင်စီထံ ပြန်လည် လွှဲပြောင်းပေးခဲ့ရတာပဲ ဖြစ်ပါတယ်။
ရွှေဖီမြေ သတင်းတွေကို Facebook နဲ့ Website အပြင် အောက်ဖော်ပြပါ ချန်နယ်တွေမှာလည်း ဝင်ရောက် ဖတ်ရှုနားဆင်နိုင်ပါတယ်။
