မိုင်းရူပ၊ မေလ ၂၈ ရက်၊ လားရှိုး
စစ်ကောင်စီတပ် ပြန်အုပ်ချုပ်နေတဲ့ ရှမ်းမြောက် လားရှိုးမြို့မှာ ဆိုင်ကယ်စီးလာတဲ့ လူတစ်ဦးထံ ရဲဝတ်စုံဝတ်ဆင်ထားတဲ့ အမျိုးသားက ဆိုင်ကယ်လုယက်သွားခဲ့တယ်လို့ ဖြစ်စဥ်ကို သိရှိထားတဲ့ လားရှိုးဒေသခံတစ်ဦးက ရွှေဖီမြေကို ပြောပါတယ်။
ဒီနေ့ မေလ ၂၈ ရက် မနက်ပိုင်းမှာ လားရှိုးမြို့ ရပ်ကွက်-၁၂ရှိ အဝေယျာလမ်းသွယ်မှာ ဆိုင်ကယ်စီးလာတဲ့ အမျိုးသားတစ်ဦးကို ရဲဝတ်စုံဝတ်ဆင်ထားတဲ့ အမျိုးသားက စစ်ဆေးမေးမြန်းမယ်ဆိုပြီး ဆိုင်ကယ်လုယက်သွားတာ ဖြစ်ပါတယ်။
“မန်ဆူလမ်းကြား အဝေယျာလမ်းသွယ်မှာ ဖြစ်သွားတာပါ။ ရဲအသွင်ဆောင်ပြီး ဓားပြတိုက်တဲ့ ပုံစံပဲ” လို့ ဖြစ်စဥ်ကို သိရှိထားတဲ့ အမျိုးသားတစ်ဦးက ရွှေဖီမြေကို ပြောပါတယ်။
စစ်ကောင်စီတပ် ပြန်အုပ်ချုပ်နေတဲ့ လားရှိုးမြို့မှာ ဌာနဆိုင်ရာတွေလည်ပတ်နိုင်ဖို့ လုပ်ဆောင်နေပေမဲ့ မကြာခဏဖြစ်ပွားနေတဲ့ လုယက်မှု၊ ခိုးမှုနဲ့ ဓားပြတိုက်မှုစတဲ့ ဒုစရိုက်မှုတွေကို စစ်ကောင်စီက ဖမ်းဆီးအရေးယူနိုင်တာ မတွေ့ရသေးပါဘူး။
ပြီးခဲ့တဲ့ မေလ ၁၇ ရက်မှာလည်း လားရှိုးမြို့ ရပ်ကွက်-၇ ရှိ ဖုန်းအပေါင်ဆိုင်တစ်ခုမှာ ဓားပြတိုက်ခံရပြီး ဆိုင်အတွင်းရှိ ဖုန်းနဲ့ လက်ဝတ်ရတနာတချို့ ပါသွားခဲ့ပါတယ်။
ပြီးခဲ့တဲ့ မေလ ၁၃ ရက်မှာလည်း လားရှိုးမြို့ မန်ဆူကျောင်းအနီး ဆိုင်ကယ်မောင်းနေတဲ့ အမျိုးသမီးတစ်ဦးကို သေနတ်ထောက်ပြီး ဓားပြတိုက်တဲ့ဖြစ်စဉ် ဖြစ်ပွားခဲ့ပါတယ်။
လားရှိုးမြို့ကို စစ်ကောင်စီတပ်က ဝင်ရောက်ပြီးနောက် ပြီးခဲ့တဲ့ ဧပြီ ၂၂ ရက်ကနေ ဒီနေ့ မေလ ၂၈ ရက်အထိ ဓားပြတိုက်မှု၊ ဓားခုတ်မှု၊ လုယက်မှု ၁၅ ကြိမ်ထက်မနည်း ဖြစ်ပွားခဲ့ပါတယ်။
တရုတ်ရဲ့ ကြားဝင်စေ့စပ်မှုနဲ့ စစ်ကောင်စီနဲ့ MNDAA အကြား အပစ်ရပ်ဖို့ သဘောတူခဲ့ပြီးနောက်ကိုးကန့်တပ်ဟာ လားရှိုးမြို့ကနေ ပြီးခဲ့တဲ့ ဧပြီ ၂၁ ရက် ထွက်ခွာခဲ့ရပြီး စစ်ကောင်စီရဲ့ အုပ်ချုပ်ရေးယန္တရား ဝင်ရောက်လည်ပတ်နေပါတယ်။
ရွှေဖီမြေ သတင်းတွေကို Facebook နဲ့ Website အပြင် အောက်ဖော်ပြပါ ချန်နယ်တွေမှာလည်း ဝင်ရောက် ဖတ်ရှုနားဆင်နိုင်ပါတယ်။
