ယာရူစိင်၊ မတ်လ ၂၅ ရက်၊ မူဆယ်
စစ်ကောင်စီတပ် ထိန်းချုပ်ထားတဲ့ မူဆယ်မြို့မှာ အမျိုးသားတစ်ဦးကို အမျိုးသား ၃ ဦးက ပြန်ပေးဆွဲသွားပြီး တစ်ပတ်ကျော်အတွင်း လုယက်မှုနဲ့ ပြန်ပေးဆွဲမှု ၃ ကြိမ်ထက်မနည်း ဖြစ်ပွားခဲ့တယ်လို့ ဒေသခံတွေက ရွှေဖီမြေကို ပြောပါတယ်။
မနေ့ မတ်လ ၂၄ ရက် ၁၀ နာရီခွဲခန့်က မူဆယ်မြို့ ကောင်းမှုလွယ်ရပ်ကွက်မှာ ဆိုင်ကယ် မောင်းလာတဲ့ အမျိုးသားတစ်ဦးကို ကားမောင်းလာတဲ့ အမျိုးသား ၃ ဦးက ဆိုင်ကယ်ပေါ်ကနေ ဆွဲချပြီး ပြန်ပေးဆွဲသွားတယ်လို့ မူဆယ်မြို့ခံ အမျိုးသားတစ်ဦးက ပြောပါတယ်။
“အဲသုံးယောက်က မျက်နှာဖုံးတော့ တပ်ထားတယ်ဗျ။ ကားပေါ်မှာလည်း နောက်တစ်ယောက် ရှိသေးတယ်။ သူတို့ သုံးယောက်တည်း မဟုတ်ဘူးဗျ။ ကောင်းမှုရပ်ကွက်မှာကျ လူအသွားအလာက သိပ်မများဘူးဗျ”
မူဆယ်မြို့မှာ တစ်ပတ်ကျော်အတွင်း လုယက်မှု ၃ ကြိမ်ထက်မနည်း ဖြစ်ပွားနေတာဟာ ကိစ္စအသေးအမွှားသာ ဖြစ်တယ်လို့ နောက်ထပ် မူဆယ်မြို့ခံ အမျိုးသားတစ်ဦးက ပြောပါတယ်။
“အခုကိစ္စက ပြန်ပေးဆွဲခံရတာနော်။ ပြီးရင် ဘာအသံမှ မကြားရတော့ဘူး။ ပြန်ပေးဆွဲခံရတဲ့သူက ဘယ်ရပ်ကွက်မှာနေလဲ ဘယ်သူလဲဆိုတာမျိုးလည်း သိရမှာ မဟုတ်တော့ဘူး။ ဘာလို့ဆို မူဆယ်မြို့ရဲ့ အခြေအနေက ကိုယ်ဖြစ်ကိုယ်ခံပေါ့နော်”
မူဆယ်မြို့မှာ လူသတ်မှု၊ ဓားပြတိုက်မှု၊ ပြန်ပေးဆွဲမှုနဲ့ လုယက်မှု မကြာခဏ ဖြစ်ပွားပေမဲ့ ဘယ်အမှုကိုမှ သက်ဆိုင်ရာက ဖော်ထုတ်နိုင်ခဲ့တာ မရှိဘူးလို့ နောက်ထပ် မူဆယ်မြို့ခံတစ်ဦးကလည်း ပြောပါတယ်။
“မူဆယ်မှာက ပိုင်ရှင်မဲ့ အလောင်းလည်း မကြာခဏ တွေ့နေရတယ်။ လူသေလဲ ဘာသတင်းမှ မကြားရဘူး ဒီအတိုင်း ဘာမှမဖြစ်သလို ပြီးသွားတယ်။ မူဆယ်မြို့ရဲ့ အခြေအနေက အတော်လေး ဆိုးလာတယ်။ ကြောက်စရာကောင်းတဲ့မြို့ ဖြစ်နေပါပြီ”
စစ်တပ်က အာဏာသိမ်းပြီးနောက်ပိုင်း မူဆယ်မြို့မှာ မူးယစ်ဆေးဝါး ရောင်းဝယ်သုံးစွဲသူနဲ့ လောင်းကစားဝိုင်းဟာ အရင်ကထက် များလာပြီး ခိုးဆိုးလုယက်မှုနဲ့ ဓားပြတိုက်မှုလည်း မကြာခဏ ဖြစ်ပွားနေတဲ့ နယ်စပ်မြို့ ဖြစ်ပါတယ်။
