လွေးလာဝ်ဇာရ်၊ မေလ ၂၈ ရက်၊ မူဆယ်
တရုတ်-မြန်မာ နယ်စပ် ရှမ်းမြောက် မူဆယ်မြို့ ကောင်းမှုတုံရပ်ကွက်မှာ နေထိုင်တဲ့ အမျိုးသား တစ်ဦးကို တအာင်းတပ် – TNLA တပ်သားလို့ စွပ်စွဲပြီး စစ်ကောင်စီတပ်က ဖမ်းဆီးရိုက်ခဲ့တယ်လို့ ဖြစ်စဉ်တွေ့ခဲ့သူ တစ်ဦးက ရွှေဖီမြေကို ပြောပါတယ်။
ဖြစ်စဉ်ဟာ မနေ့ မေလ ၂၇ ရက် နေ့လယ် ၁၂ နာရီဝန်းကျင်က ဖြစ်ပွားခဲ့ပြီး မူဆယ် လှိုဏ်ဂူဘုရားမှာ စစ်ကောင်စီတပ် ၁၀ ဦးခန့်က အမျိုးသားတစ်ဦးကို ဝိုင်းရိုက်တာလို့ ဆိုပါတယ်။
“မနေ့က စစ်သား ၁၀ ယောက်နဲ့ ပလောင်လူငယ်တစ်ယောက်ကို ဝိုင်းရိုက်နှက်နေတာ။ ပလောင်စစ်သားဆိုပြီး စွပ်စွဲတာလေ။ ကြောက်လို့ ပုံရော ဗီဒီရိုရော မရိုက်ရဲဘူး။ ကိုယ်တိုင်မြင်ခဲ့တာ။ တချို့က ဝါးလုံးတွေနဲ့ ထင်းလုံး တချို့က ကြိုးတွေနဲ့ ဝိုင်းရိုက်ကြတာ” လို့ ပြောပါတယ်။
ရိုက်နှက်ခံရသူ အမျိုးသားဟာ အသက် ၂၂ နှစ် မိုင်းညီ ဆိုသူဖြစ်ပြီး ရိုက်နှက်ခံရတဲ့အပြင် ဖမ်းဆီးခေါ်ဆောင်သွားတယ်လို့ အထက်ပါ ၎င်းဆီက သိရပါတယ်။
စစ်ကောင်စီတပ် ထိန်းချုပ်ထားတဲ့ မူဆယ်မြို့မှာ မူးယစ်ဆေးဝါး ရောင်းဝယ်သုံးစွဲသူနဲ့ လောင်းကစားဝိုင်းဟာ အရင်ကထက် ပိုများလာပြီး နေ့စဉ်လိုလို ခိုးမှု၊ လုယက်မှု၊ ဓားပြတိုက်မှုနဲ့ ပြန်ပေးဆွဲမှုတွေ ဖြစ်ပွားနေပေမဲ့ တရားခံတွေကို ဖမ်းဆီးနိုင်တာ မရှိသလို အမှုတိုင်းမှာလည်း အများစုက လက်နက်ကိုင်ဆောင်ထားကြတဲ့သူတွေ ဖြစ်နေတယ်လို့ ဒေသခံတွေက ရွှေဖီမြေကို ပြောဆိုထားဖူးပါတယ်။
ရွှေဖီမြေ သတင်းတွေကို Facebook နဲ့ Website အပြင် အောက်ဖော်ပြပါ ချန်နယ်တွေမှာလည်း ဝင်ရောက် ဖတ်ရှုနားဆင်နိုင်ပါတယ်။
