ယာရူစိင်၊ မတ်လ ၁၈ ရက်၊ နောင်ချို
ရှမ်းမြောက် တန့်ယန်းမြို့မှာ နေထိုင်တဲ့ အသက် ၂၉ နှစ်အရွယ်ရှိတဲ့ မောင်ညီညီအောင်ဆိုသူဟာ နောင်ချိုမြို့ထဲမှာ ၁ လကျော်ကြာတဲ့အထိ ပျောက်ဆုံးနေတယ်လို့ မိသားစုဝင်တွေက ရွှေဖီမြေကို ပြောပါတယ်။
ပြီးခဲ့တဲ့ ဖေဖော်ဝါရီ ၄ ရက်မှာ မန္တလေးတိုင်း၊ နွားထိုးကြီးမြို့နယ်ကို သွားဖို့ တန့်ယန်းကနေ ထွက်သွားခဲ့ရာ နောင်ချိုမြို့အနီးတစ်ဝိုက်မှာ ပျောက်ဆုံးသွားတာလို့ ဆိုပါတယ်။
“၄ ရက်နေ့တုန်းက သူလားရှိုးမှာ တစ်ညအိပ်သေးတယ်။ ၅ ရက်နေ့ နေ့လယ်အချိန်မှာ နောင်ချိုမြို့ သံဖိုးရွာကို ရောက်တယ်လို့တော့ ပြောပါတယ်။ နောက်တစ်ခါ ဖုန်းပြန်ဆက်ကြည့်တော့ စကားဝဲတဲ့ လူတစ်ယောက်ကိုင်တယ်။ ဖုန်းကို သူ့ဆီ ၃ သောင်းနဲ့ ရောင်းသွားပြီတဲ့။ ပြီးတော့ ဖုန်းကို ချလိုက်တယ်။ ဖုန်းထပ်ခေါ်လည်း မကိုင်တော့ဘူး။ အဲဒီနောက်စပြီး အဆက်အသွယ်မရတော့ဘူး” လို့ မိသားစုဝင်တစ်ဦးက ပြောပါတယ်။
နောင်ချိုမြို့နယ်မှာ စစ်ကောင်စီတပ်နဲ့ တအာင်းတပ်တို့အကြား တိုက်ပွဲဖြစ်ပွားနေတာကြောင့် အဆက်အသွယ်ပြတ်တောက်နေတဲ့ မောင်ညီညီအောင်အတွက် မိသားစုဝင်တွေက စိတ်ပူနေပြီး သူ့ကိုတွေ့ရှိသူတွေအနေနဲ့လည်း မိသားစုထံ ဆက်သွယ်အကြောင်းကြားလာပေးဖို့ကို တောင်းဆိုထားပါတယ်။
နောင်ချိုမြို့နဲ့ ပြင်ဦးလွင်မြို့ကြားမှာ အခုလို လူပျောက်တာတွေ မကြာခဏဖြစ်ပွားနေပြီး ပြီးခဲ့တဲ့ ဖေဖော်ဝါရီ ၁၄ ရက်မှာ ကားသမား ၂ ဦးနဲ့ မတ်လ ၆ ရက်မှာ အမျိုးသား ၁ ဦးတို့လည်း လက်ရှိအချိန်အထိ အဆက်အသွယ်ပြတ်တောက်ပြီး ပျောက်ဆုံးနေပါတယ်။
