နမ္မတူမြို့က အမျိုးသားတစ်ဦး ပြင်ဦးလွင်နဲ့ နောင်ချိုကြားမှာ ပျောက်ဆုံးပြီး မိသားစုနဲ့ အဆက်အသွယ်ပြတ်တောက်နေ

လွေးထွေး၊ မတ်လ ၁၀ ရက်၊ နမ္မတူ

တအာင်းတပ် TNLA ထိန်းချုပ်ထားတဲ့ ရှမ်းမြောက် နမ္မတူမြို့ ရပ်ကွက် (၃) နေ အမျိုးသားတစ်ဦးက ပြင်ဦးလွင်နဲ့ နောင်ချိုကြားမှာ ‌တစ်ပတ်ကျော်ကြာတဲ့အထိ ပျောက်ဆုံးနေပြီး မိသားစုနဲ့အဆက်အသွယ် ပြတ်တောက်နေတယ်လို့ မိသားစုဝင်နဲ့ နီးစပ်သူ အမျိုးသမီးတစ်ဦးရဲ့ ပြောပြချက်အရ သိရပါတယ်။

ပြီးခဲ့တဲ့ မတ်လ ၃ ရက် ညနေ ၃ နာရီ ဝန်းကျင်မှာ မန္တလေးတိုင်း ပြင်ဦးလွင်မြို့နဲ့ ရှမ်းမြောက် နောင်ချိုမြို့ကြားက ဝက်ဝံဂိတ်အနီးမှာ ပျောက်ဆုံးသွားခဲ့တာ ဖြစ်ပါတယ်။

မိသားစုဝင်နဲ့ နီးစပ်သူ အမျိုးသမီးက “သူက မန္တလေးကနေ ဆိုင်ကယ်နဲ့ တစ်ယောက်ထဲ ပြန်လာတာ။ သူ့အမေနဲ့ ဝက်ဝံဂိတ်ရောက်ခါနီး စကားပြောသေးတယ်။ အဲနောက်မှာ ဖုန်းခေါ်တော့ သူမဟုတ်တဲ့ တခြားတစ်ယောက်က ကိုင်တာ။ သူမရှိဘူးလို့ဘဲ ပြောတာ။ အဲဒီနောက် ဒီနေ့အထိ လုံးဝဆက်မရတော့ဘူး” လို့ ရွှေဖီမြေသို့ ပြောပါတယ်။

ပျောက်ဆုံးသွားသူအမျိုးသားဟာ အသက် (၃၅) နှစ်အရွယ် စိုင်းလောဝ်ဦး (ခ) စိုင်းအွတ်ဆိုသူဖြစ်ပြီး ပြီးခဲ့တဲ့ ဖေဖော်ဝါရီ (၂၇) ရက်ကတည်းက မန္တလေးမြို့သို့ အလုပ်ကိစ္စနဲ့ သွားခဲ့ရာကနေ အပြန်မှာပဲ ပျောက်ဆုံးသွားတာဖြစ်တယ်လို့ ဆိုပါတယ်။

အလားတူဖြစ်စဉ်မျိုးဟာ ပြီးခဲ့တဲ့ ဖေဖော်ဝါရီ (၁၄) ရက်ကလည်း နောင်ချိုမြို့နယ် ခက်ချန်ရွာကနေ သုံးဆယ်ရွာဘက်ကိုသွားတဲ့ ကားသမား ၂ ဦးက ပျောက်ဆုံးသွားခဲ့ဖူးပါတယ်။

ပြင်ဦးလွင်နဲ့ နောင်ချိုကြားမှာ စစ်ကောင်စီတပ်အပြင်၊ TNLA နဲ့ ပူးပေါင်းတပ်တွေလည်း သွားလာနေတာဖြစ်ပါတယ်။

Shwe Phee Myay YouTube

Shwe Phee Myay Telegram