ယာရူစိင်၊ မေလ ၃၀ ရက်၊ ကျောက်မဲ
ကျောက်မဲမြို့နယ် တော့ဆန်အုပ်စု ကုန်းသာရွာသစ်(ကဒေဲင်လိုင်းကျေးရွာ) မှာ ရွှေတူးရာကနေ မြေစာပြိုလို့ အမျိုးသား တစ်ဦး သေဆုံးသွားခဲ့တယ်လို့ ဖြစ်စဉ်သိရှိသူ တစ်ဦးက ရွှေဖီမြေကို ပြောပါတယ်။
ပြီးခဲ့တဲ့ မေလ ၂၇ ရက် ညနေ ၃ နာရီခွဲအချိန်မှာ ကျောက်မဲမြို့နယ် ကုန်းသာကျေးရွာနဲ့ နီးစပ်တဲ့ ဆန်ခမ်း လို့ခေါ်တဲ့ ရွှေတူးဖော်တဲ့နေရာမှာ ရွှေတူးပြီး ခဏအနားယူနေစဉ်မှာ အပေါ်ကနေ မြေစာပြိုကျလို့ သေဆုံးသွားတာဘဲ ဖြစ်ပါတယ်။
“သူက နေ့တိုင်းရွှေသွားတူးတယ်။ ဥပုဒ်နေ့ တစ်ရက်ဘဲ အလုပ်နားတာ။ ရွှေတူးတဲ့နေရာက အဲဒီရွှေတွင်းက ပိုင်ရှင်တွေ တူးပြီးတဲ့နေရာတွေမှာ သူတို့နှစ်ယောက်က ပြန်လိုက်ရှာတယ် လိုက်တူးတယ်ပေါ့။ ဖြစ်ချင်တော့ အဲနေ့ ရွှေသွားတူးတဲ့နေ့က သူတို့နှစ်ယောက်တည်းဘဲ သွားတာ။ ရွှေတွေ သွားတူးပြီး နားနေချိန်မှာ သူခဏနားလိုက်တာပါ။ အပေါ်ကနေ မြေပြိုကျပြီး သူ့ကိုမြေတွေ ပိလိုက်တာ။ သူ့သူငယ်ချင်းက သူသောက်ဖို့ ရေသွားခပ်နေတဲ့အချိန်ဖြစ်နေတာ။ ရေခပ်လို့ ပြန်လာတော့ သူ့ခန္ဓာကိုယ်က မြေအောက်ရောက်နေပြီ။ အပေါ်ကကျလာတဲ့ မြေစာတွေမှာ ကျောက်ခဲတွေလည်းပါတော့ သူ့ခေါင်းကို ဖိတော့ ခေါင်းတောင်ပြားသွားတယ်။ လက်နဲ့ ပေါင်တွေလဲ အကုန်ကျိုးသွားတယ်။ အဲနေရာမှာတင် သူ အသက်မရှိတော့ဘူး”
မြေစာပိလို့ သေဆုံးသွားခဲ့တဲ့ အမျိုးသားဟာ အသက် ၅၅ နှစ်အရွယ်ရှိတဲ့ တာကန်ဟိန်း(တာကွန်မိုလောဝ်) ဟာ ကျောက်မဲမြို့နယ် ကုန်းသာကျေးရွာမှာ နေထိုင်သူဖြစ်ကြောင်း သိရပါတယ်။
၎င်းအမျိုးသားဟာ ကျေးရွာအတွင်းရှိ ဘုန်းကြီးကျောင်းကော်မတီတာဝန်၊ လူငယ်ခေါင်းဆောင်တာဝန်၊ အလှူအဒါန်းပြုတဲ့နေရာမှာ ပန်းတကာတာဝန်၊ စာသင်ကျောင်းကော်မတီတာဝန်နဲ့ ကျေးရွာရဲ့အဓိပတိတာဝန်တွေအပြင် တခြားတာဝန်တွေကို ထမ်းဆောင်တဲ့သူဖြစ်ပါတယ်။
ရွှေဖီမြေ သတင်းတွေကို Facebook နဲ့ Website အပြင် အောက်ဖော်ပြပါ ချန်နယ်တွေမှာလည်း ဝင်ရောက် ဖတ်ရှုနားဆင်နိုင်ပါတယ်။
