ဖေဖော်ဝါရီ ၅ ရက်၊ ကျောက်မဲ
ဒီနေ့ ဖေဖော်ဝါရီ ၅ ရက် မနက် ၉ နာရီအချိန်လောက်မှာ စစ်ကောင်စီတပ် ပြန်လည်ထိန်းချုပ်ထားတဲ့ ရှမ်းမြောက် ကျောက်မဲမြို့ ရပ်ကွက် (၄) ရှိ မီဂါစတုံးဖုန်းဆိုင်မှာ လက်နက်အပြည်အစုံ ဝတ်ဆင်ထားတဲ့ စစ်ကောင်စီတပ်သားတစ်ဦးက ဖုန်းကို ဝင်ရောက်လုယက်ခဲ့တဲ့ဖြစ်စဉ် ဖြစ်ပွါးခဲ့တယ်လို့ မျက်မြင်တွေ့ရှိသူတွေက ရွှေဖီမြေကို ပြောပါတယ်။
“ဆိုင်ရှင်က ကယ်ပါအုန်း ကယ်ပါအုန်း အော်တာကို အစက ခွေးကိုက်ခံရတာလားဆိုပြီး ကြည့်တာ။ ပြီးမှ လူတွေက အဲဖုန်းလုပြီး ထွက်လာတဲ့တဲ့ စစ်သားကို ဝိုင်းချုပ်ပြီး ကန်ကြတာ။ လူက ရစရာမရှိတော့ဘူး။ အဲဖုန်း ဝင်လုတဲ့ကောင်က ၂၄၊ ၂၅ နှစ်လောက်ပဲ ရှိအုန်းမယ်။ ရုပ်ကလည်း သန့်သန့်လေးပဲ” လို့ ဆိုပါတယ်။
ဝိုင်းဝန်းရိုက်နှက်ပြီးနောက် အဲဒီစစ်ကောင်စီတပ်သားကို လူထုတွေက ရဲလက်ထဲ အပ်နှံလိုက်ပြီး ရဲတွေက ခေါ်ဆောင်သွားခဲ့တယ်လို့ ဆိုပါတယ်။
ကျောက်မဲမှာ စစ်ကောင်စီ ဝင်ရောက်ထိန်းချုပ်ပြီးနောက် နေအိမ်ဖောက်ထွင်းမှု၊ လုယက်မှု၊ မူးယစ်ဆေးဝါးသုံးစွဲမှု များပြားလာနေတယ်လို့ ဒေသခံတွေက ဆိုပါတယ်။
ဒါ့အပြင် ကျောက်မဲအဝင်လမ်းတွေဖြစ်ကြတဲ့ မိုးကုတ်-ကျောက်မဲနဲ့ မိုင်းငေါ့-ကျောက်မဲ လမ်းမပေါ်မှာလည်း ဂိတ်ဖွင့်ထားပြီး ကားသမားတွေထံ ငွေအဆမတန်ကောက်ခံနေတယ်လို့ ကိုယ်တိုင်ကြုံတွေ့ခဲ့ရသူတွေက ရွှေဖီမြေကို ပြောပါတယ်။
~ ~ ~
ရွှေဖီမြေ သတင်းတွေကို Facebook နဲ့ Website အပြင် အောက်ဖော်ပြပါ ချန်နယ်တွေမှာလည်း ဝင်ရောက် ဖတ်ရှုနားဆင်နိုင်ပါတယ်။
