ပိုႈလဘား၊ ကျံရ်ေႎှဲပ်ဘျူရီ ဆငည်း 2၊ လာဆေဝ်
တိုအီးအရာပ်ကဲ အူအီးက္လာင်းတဖုင်ဆျှိုည်ဖီမျေဒါႈ ဒီႎီရ်ဘိူန်း တံပ်ကညာအာဏာဆီုက်ဇေဝ်ကဲတ ထိင်ခြဲ ပကပီုန်ဆျှံမ်ကဒါႇပိူည် ခေဲင်ကီုင်းလာဆေဝ်နီန် ဂါင်အ်ုန်အီရေဲန်ဇီုင်းကာန်ခြီရ်နီန် ကတူႈအီစိုန် တောပ်ဟာဝ်း ခြီရ် 5 ဆာႇအောႏ။
အမှိူဝ် ကျံရ်ေႎှဲပ်ဘျူရီ ဆငည်း 1 ဘံန်ဆံန်ကပံတ် 12 နြီဒိူန် ခေဲင်ကီုင်းလာဆေဝ် ပဇံင် 4နီန် ကောန်အီမာည်း 6 အီးလီပ်စိုန်ဟာဝ်း ဂါင်အ်ုန်အီရေဲန်ဇီုင်းကာန်ခြီရ်နီန်အောႏ။
“ အ်ုန်မိုႈလိူည်ရဘံန်ကျောင်ဒီငျားစဝ်ဒိူန်တ အီပျံမ်းအ်ုန်။ ငျားပွံတ်ခိင်တငါဝ်းကဲတ တြားနီန်။ ဂါင်းဒီန်အာဝ်မိုႈစိ ကဲႎိူဝ်ႈဆဴင်ခြီရ်။ အ်ုန်ဘိူည်အာဝ်ႎိူဝ်ႈဆဴင်မာ် ဂါ်ဆိင်မိုႈ ခြီရ်အ်ုန်ယိူဝ်ႇဒေဲႈဒိုႇတကဲ။ အ်ုန်မိုႈဒီရေဲန်ဒီကော်။ အ်ုန်မိုႈဒီရေဲန်ဂြိုခြီရ်နီန်ဒီႈ။ အ်ုန်မိုႈဘိုးဂါင် ဒီပေါင်ပ္လေႈအီးတခြီရ်။ အ်ုန်တောပ်ဟာဝ်း ခြီရ် 5 ဆာႇ ကာည်းရိူန်းဒီကော်”
ကဲဒါႈ ကံပ်ရောတ်ကဇေန်နီး ကဲညှံမ်ဘိူန်းစိဒေတိုည်း ကောန်အီမာည်း 6 အီး ကဲအီစိုန်ဟာဝ်းကဲဒီန်အောႏ။
တိုအီးအရာပ်ကဲ က္လာင်းတဖုင်ဆျှိုည်ဖီမျေဒါႈ ဇူႈဒါခည်ဇူႈကျံရ်ဇံန်နႎရီရောတ် ကျံရ်ဇံန်နႎရီ နှားအိုည်နီန် ခေဲင်ကီုင်းလာဆေဝ်နီန် ကား 5 ကြောင် ကတူႈဖါ်ႈအီဘြား ကံပ်ရောတ်ကဇေန်နီး ညှံမ်ဘိူန်းစိဒေတိုည်း တိုအီးဘြားကဲဒီန်အောႏ။
ဘာည်းလိူည်ဒီန် ခည်ကျံရ်ဇူလည် ဆငည်း 4 ခည်ဆန်ုမ် 2025 ဒိူန်မာ် ခေဲင်ကီုင်းလာဆေဝ် ပဇံင်း 9 ရီမ်းပြောဒေင်ဘူတာနီန် ဆဴင်ခြီရ်အူဆဴင် ကတူႈအီစိုန် တောပ်ဟာဝ်းရိူန်း 200 ဆဲန် ကာည်း ခြီရ် 75 ခံန်။
တိုအီးခေဲင်ကီုင်းကဲ က္လာင်းတဖုင်ဆျှိုည်ဖီမျေဒါႈ ဘံန်ထိင်ခြဲဟာဝ်း တံပ်ကညာအာဏာဆီုက်ဇေဝ်ကဲ ကီုင်းလာဆေဝ်နီန် ပါင်ကတော်မာ် ဂီုန်းဒေဲႈဖါ်ႈ အီဒါခံင်မဝ်းမာ်ဂီုန်း ဆဲႈဒီန် တိုအီးအီဘြားမာ် ဂီုန်းဒေဲႈအောႏ။
ကဝ်အီကပ္လါႇဘေဲႇဆဒါင် – လိုည်းပိုႈဆပေ
~ ~ ~
ဆဒါင်ဖုင်ယဲဆျှိုည်ဖီမျေနီန် အာဝ်ႎံန်း ခေဲင် Facebook ကာည်း Website ဘိူန်းဘိုးဒီရ်ႈ၊ ဆဒံင်တငါဝ်း ခေဲင် ချှံန်နယ် ပ်ုန်ကိက်ပ္လေႈ ရခြူမ်ကဲနီန်အောႏ။
