မိုင်းရူပ၊ မေလ ၂၆ ရက်၊ တာချီလိတ်
မိုးအဆက်မပြတ်ရွာသွန်းမှုကြောင့် ရေကြီးရေလျှံတာတွေ ဖြစ်နေတဲ့ ရှမ်းအရှေ့ တာချီလိတ်မြို့ မယ်ဆိုင်ချောင်းမှာ သေဆုံးနေတဲ့ အမျိုးသားအလောင်း ၁ လောင်းတွေ့ရှိခဲ့တယ်လို့ ဒေသခံတွေဆီက သိရပါတယ်။
မနေ့ မေလ ၂၅ ရက်မနက်ပိုင်းမှာ မယ်ဆိုင်ချောင်းမှာ မျှောပါလာတဲ့ အမျိုးသားတစ်ဦးရဲ့အလောင်းကို လူမှုကူညီရေးအသင်းတွေက သွားရောက်သယ်ယူခဲ့ပါတယ်။
“အဲလူက လမ်းဘေးမှာ နေတဲ့သူ ချောင်းထဲမှာ ဘယ်လိုမျိုးကျသွားလည်း မသိဘူး။ ပြုတ်ကျပြီး ဆုံးသွားတာ။ ဒီနေ့တော့ ရေကြီးတာ မရှိတော့ဘူး” လို့ သေဆုံးသူရဲ့ အလောင်းကို သွားရောက်သယ်ယူခဲ့တဲ့ လူမှုကူညီရေးအဖွဲ့ရဲ့ တာဝန်ရှိသူတစ်ဦးက ရွှေဖီမြေကို ပြောပါတယ်။
ဒီနေ့ မေလ ၂၆ ရက်မှာတော့ မယ်ဆိုင်ချောင်းရဲ့ စိုးရိမ်ရေမှတ်အောက် ၁ ပေခန့်အထိ ရောက်ရှိနေပြီး နောက် ၁၂ နာရီအတွင်း စိုးရိမ်ရေမှတ်ရောက်ရှိနိုင်တာကြောင့် တာချီလိတ်မြို့အတွင်းရှိ မြစ်ကမ်းဘေးနဲ့ မြေနိမ့်ပိုင်းမှာ နေထိုင်သူတွေအနေနဲ့ အထူးသတိပြုနေထိုင်ကြဖို့ စစ်ကောင်စီရဲ့ မိုးဇလက သတိပေးထားပါတယ်။
တာချီလိတ်မှာ နှစ်စဥ် မိုးရာသီရောက်တိုင်း ရေကြီးရေလျှံတာတွေမကြာခဏဖြစ်နေပြီး လူသေဆုံးတဲ့ ဖြစ်စဥ်တွေလည်း မကြာခဏဖြစ်ပွားနေပါတယ်။
စစ်ကောင်စီရဲ့ မိုးလေဝသနဲ့ ဇလဗေဒညွှန်ကြားမှုဦးစီးဌာနခန့်မှန်းချက်အရ မေလ ၂၅ ရက်ကနေ ဇွန်လ ၂ ရက်အထိ တနိုင်ငံလုံးအတိုင်းအတာနဲ့ မိုးရွာနိုင်ပြီး တချို့ဒေသတွေမှာ နေရာကွက်ပြီး မိုးကြီးနိုင်ပါတယ်လို့ ထုတ်ပြန်ထားပါတယ်။
ရွှေဖီမြေ သတင်းတွေကို Facebook နဲ့ Website အပြင် အောက်ဖော်ပြပါ ချန်နယ်တွေမှာလည်း ဝင်ရောက် ဖတ်ရှုနားဆင်နိုင်ပါတယ်။
