မိုင်းပန်ပျော်၊ ဧပြီလ ၂၈ ရက်၊ နမ္မတူ
တအာင်းတပ်မတော်-TNLA ထိန်းချုပ်ထားတဲ့ နမ္မတူမြို့နယ် မိုင်းဟုန်းကျေးရွာနဲ့ နားမတ်ကျေးရွာကြားမှာရှိတဲ့ ငါးကန်တစ်ခုထဲကို အသက် ၁၅ နှစ်အရွယ်ရှိတဲ့ အမျိုးသားငယ်တစ်ဦးက ရေဆင်းကူးရာမှာ ရေနစ်ပြီးသေဆုံးသွားခဲ့တယ်လို့ ရွှေဖီမြေက စုံစမ်းသိရှိရပါတယ်။
ဖြစ်စဉ်ဟာ ပြီးခဲ့တဲ့ ဧပြီလ ၂၅ ရက် နေ့လယ် ၁၂ နာရီ ၅၀ မိနစ်မှာ အဲ့ဒီအမျိုးသားငယ်က တရုတ်ကျောင်းကနေ ပြန်လာတဲ့အချိန် မိုင်းဟုန်းနဲ့ နားမတ်ကြားမှာရှိတဲ့ ငါးကန်ထဲကို ရေဆင်းကူးပြီး ရေနစ်သေဆုံးသွားခဲ့တာဖြစ်တယ်လို့ ဒေသခံအမျိုးသားတစ်ဦးက ရွှေဖီမြေကို ပြောပါတယ်။
“သူတို့ ၄ ယောက်ရှိတယ်။ တရုတ်ကျောင်းကနေပြန်လာတာ နားမတ်နဲ့ မိုင်းဟုန်းကြားက လိုင်ချီးသီးခြံက ငါးကန်ထဲကို ရေဆင်းကူးရင်း သေဆုံးသွားတာ။ သူ့သူငယ်ချင်းတွေပြောတယ် မင်းရေကူးတတ်လား ကူးတတ်တယ်ဆိုပြီးတော့ အဝတ်ချွတ်ပြီးရေထဲခုန်ချပြီး ပျောက်သွားတာ ကျန်တဲ့သုံးယောက်က ရေထဲဆင်းပြီး သူ့ကိုလိုက်ရှာသေးတယ် မတွေ့ဘူး”
ပြီးခဲ့တဲ့ ဧပြီလ ၂၆ ရက် နေ့လယ်ပိုင်း ၂ နာရီဝန်းကျင်မှာ နမ္မတူမြို့နယ် TNLA ရဲတပ်ဖွဲ့နဲ့ မီးသတ်အဖွဲ့တို့က ရေနစ်ပြီး သေဆုံးခဲ့တဲ့ အမျိုးသားငယ်ရဲ့ ရုပ်အလောင်းကို ရှာတွေ့ခဲ့ပါတယ်။
အလားတူ ပြီးခဲ့တဲ့ ဧပြီလ ၂၁ ရက်မှာလည်း နမ္မတူချောင်းမှာ အမျိုးသားငယ်တစ်ဦး ရေနစ်သေဆုံးခဲ့ပါတယ်။
