ယာရူစိင်၊ မေလ ၂၈ ရက်၊ မူဆယ်
တရုတ်ပြည် ရွှေလီမြို့ထဲကို ပွဲစားအမျိုးသမီးတစ်ဦးက နိုင်ငံကူးလက်မှတ် လုပ်ပေးမယ်ဆိုပြီး အမျိုးသမီး ၃ ဦးထံ ငွေကျပ် သိန်း ၉၀ လိမ်လည်သွားတယ်လို့ လိမ်ခံရတဲ့ ကာယကံရှင်ဖြစ်သူတစ်ဦးက ရွှေဖီမြေကို ပြောပါတယ်။
တရုတ်-မြန်မာနယ်စပ် မူဆယ်မြို့က အသက် ၃၅ နှစ်အရွယ်ရှိတဲ့ မခင်မြင့်အေး ဆိုသူဟာ တရုတ်ပြည်ဝင်ခွင့်ရဖို့အတွက် နိုင်ငံကူးလက်မှတ်(စာအုပ်နီ) လုပ်ပေးမယ်ဆိုပြီး သီပေါမြို့က အမျိုးသမီး ၃ ဦးထံကို ငွေ သိန်း ၉၀ တောင်းယူပြီးလိမ်လည်သွားတာ ဖြစ်ပါတယ်။
“သူတို့ တစ်ယောက်ကို သိန်း ၃၀ ပေးရတာ။ သူတို့ ၃ ယောက်က ရွှေလီမြို့မှာ အလုပ်လုပ်ဖို့သွားချင်တာ။ သီပေါမှာကတည်းက စာအုပ်နီလုပ်ပေးမယ်ဆိုတဲ့ တအာင်း အမျိုးသမီးတစ်ယောက်က မူဆယ်ဘက်ကို လာဖို့ပြောတာ။ အဲကတည်းက သူတို့မသွားဖို့ ကျမ တားပါသေးတယ်။ ပွဲစားတွေနဲ့စာအုပ်နီလုပ်ရင် အလိမ်ခံရမယ်လို့ ပြောပြသေးတယ်။ ကျမ တတ်နိုင်သလောက် တားခဲ့ပေမဲ့ ရောက်အောင်သွားသေးတယ်။ သူတို့ သုံးယောက် မူဆယ်ရောက်တာက မေလ ၁၂ ရက်က ရောက်တာ”လို့ လိမ်လည်ခံရသူနဲ့ နီးစပ်သူတစ်ဦးက ဆက်ပြောပါတယ်။
နိုင်ငံကူးလက်မှတ် (စာအုပ်အနီ) ရဖို့အတွက် ပွဲစားအမျိုးသမီးထံကို ပြီးခဲ့တဲ့ မေလ ၁၄ ရက်က ငွေကျပ် သိန်း ၉၀ ပေးပြီးတဲ့နောက်မှာဘဲ မေလ ၁၅ ရက်ကစပြီး ဒီနေ့ မေလ ၂၈ ရက်အထိ ပွဲစားအမျိုးသမီးနဲ့ အဆက်အသွယ်မရတော့ဘူးလို့ ကာယကံရှင်ဖြစ်သူတစ်ဦးက ပြောပါတယ်။
“ပိုက်ဆံပေးပြီး နောက်တစ်ရက်မှာ အဲပွဲစားမက သူဝယ်စရာရှိတယ်ဆိုပြီး အပြင်ထွက်သွားတယ်။ သူအပြင်ထွက်သွားတာက မေလ ၁၄ ရက် ညနေအချိန် လောက်ဖြစ်မယ်။ အဲနေ့ည ၈ နာရီလောက်ကတော့ သူနဲ့ အဆက်အသွယ်ရသေးတယ်။ ညနက်လာတော့ ပြန်မလာသေးလို့ဆိုပြီး ဖုန်းခေါ်ကြည့်တော့ စက်ပိတ်တဲ့။ အစတော့ သူဖုန်းအားကုန်သွားတယ် ထင်လို့ ပြန်မခေါ်ဖစ်ဘူး။ မနက်ရောက်တော့လဲ သူမရောက်သေးလို့ ဖုန်းထပ်ခေါ်လဲ စက်ပိတ်ဘဲ ပြောနေတာ။ အဲဒီနောက်ပိုင်းကစပြီး ဖုန်းဘယ်လောက်ဆက်ဆက် မရတော့ဘူး”လို့ ဆက်ပြောပါတယ်။
တရုတ်ပြည်ထဲ ဝင်ရောက်ဖို့ ထုတ်ပေးတဲ့ နိုင်ငံကူးလက်မှတ် (စာအုပ်အနီ)ကို မူဆယ်ခရိုင်အတွင်း နေထိုင်သူတွေသာ လုပ်ကိုင်ခွင့်ရတာ ဖြစ်ပါတယ်။
ဒါ့ကြောင့် မူဆယ်ခရိုင်အတွင်းမဟုတ်တဲ့သူတွေကို ပွဲစားကနေတဆင့် စာအုပ်အနီ လုပ်ပေးမယ်ဆိုပြီး ငွေကြေးလိမ်လည်ခံရတာတွေ မကြာခဏ ဖြစ်ပွားနေပါတယ်။
ရွှေဖီမြေ သတင်းတွေကို Facebook နဲ့ Website အပြင် အောက်ဖော်ပြပါ ချန်နယ်တွေမှာလည်း ဝင်ရောက် ဖတ်ရှုနားဆင်နိုင်ပါတယ်။
