ခိုင်လေး၊ ဖေဖော်ဝါရီ ၁၅ ရက်၊ နောင်ချို
တအာင်းတပ်မတော်- TNLA ထိန်းချုပ်ထားတဲ့ ရှမ်းမြောက် နောင်ချိုမြို့နယ် မဲပုတ်ရွာမှာ လက်နက်ကြီး ကျရောက် ပေါက်ကွဲမှုကြောင့် မိခင်ဖြစ်သူ သေဆုံးပြီး ၅ နှစ်အရွယ် ကလေးငယ်တစ်ဦး အပြင်းအထန် ဒဏ်ရာ ရရှိခဲ့ပါတယ်။
ဒေါ်ဖြူလှိုင်ဆိုသူရဲ့ အိမ်ဘေးကို ပြီးခဲ့တဲ့ ဖေဖော်ဝါရီ ၁၁ ရက် မနက် ၇ နာရီမှာလက်နက်ကြီး ကျရောက် ပေါက်ကွဲတာကြောင့် သားအမိနှစ်ဦးကို ထိမှန်ခဲ့တာ ဖြစ်ပါတယ်။
မိသားစုဝင်တစ်ဦးက “ကလေးအမေနဲ့ကလေးက အိမ်ခြံ၀င်းအတွင်းမှာ ရှိနေခိုက် ထိတာပါ။ လားရှိုးဆေးရုံ ပို့တဲ့အချိန် လမ်းတစ်ဝက်မှာဘဲ အမေဖြစ်သူက ဆုံးသွားတာ။ ရွာဘက်မှာဘဲ ပြန်သင်္ဂြိုလ်လိုက်တယ်။ ကလေးက ဘယ်ဘက်ခြေထောက်မှာ ဒဏ်ရာ ပြင်းထန်တော့ ခြေထောက် ဒူးအပေါ်ဘက်အထိ ဖြတ်လိုက်ရတယ်” လို့ ပြောပါတယ်။
သေဆုံးသွားသူဟာ အသက် ၃၃ နှစ်အရွယ် ဒေါ်ဖြူလှိုင်ဆိုသူဖြစ်ပြီး ဒဏ်ရာရတဲ့ ကလေးကတော့ ၅ နှစ်အရွယ် မောင်ကျော်မိုးဆိုသူ ဖြစ်ပါတယ်။
နောင်ချိုမြို့နဲ့ မိုင်၂၀ ကွာဝေးတဲ့ တောင်းခမ်းရွာမှာ ပြီးခဲ့တဲ့ ၂၀၂၄ ခုနှစ် ဩဂုတ်လကစပြီး စစ်တပ်နဲ့ TNLA တို့ တိုက်ပွဲ ဖြစ်ပွားခဲ့ရာ လက်ရှိမှာလည်း တိုက်ပွဲ ပြင်းထန်ပြီး တောင်းခမ်းရွာနဲ့ လက်နက်ကြီး ကျကွဲတဲ့ မဲပုတ်ရွာဟာ ၄ မိုင်ခန့်သာ ကွာဝေးပါတယ်။
ဖေဖော်ဝါရီ ၁ ရက်ကနေ ၁၄ ရက်အထိ လေကြောင်း တိုက်ခိုက်မှုကြောင့် သေဆုံးသူ အမျိုးသမီး ၁၁ ဦးအထိ ရှိလာပြီး သေဆုံးသူထဲ ရှမ်းပြည်နယ်မှာ ၈ ဦးနဲ့ သေဆုံးမှု အများဆုံး ဖြစ်တယ်လို့ AAPP က မနေ့ ဖေဖော်ဝါရီ ၁၄ ရက်မှာ ထုတ်ပြန်ထားပါတယ်။
