ပို့လဘား၊ ဇန်နဝါရီ ၂၂ ရက်၊ နောင်ချို
တအာင်းတပ်မတော်- TNLA ထိန်းချုပ်ထားတဲ့ ရှမ်းမြောက် နောင်ချိုမြို့မှာ စစ်ကောင်စီတပ်က လေယာဉ်နဲ့ ထပ်မံ ဗုံးကြဲတိုက်ခိုက်ခဲ့လို့ အရပ်သား ၈ ဦး သေဆုံးခဲ့ပါတယ်။
ဒီနေ့ ဇန်နဝါရီ ၂၂ ရက် မနက် ၁၁ နာရီခွဲမှာ နောင်ချိုမြို့ရှိ ပါရမီ လက်ဖက်ရည်ဆိုင်မှာ လေယာဉ်နဲ့ ဗုံးကြဲတိုက်ခိုက်ခဲ့လို့ အရပ်သား ၈ ဦး ထပ်မံ သေဆုံးခဲ့ရတယ်လို့ ဖြစ်စဉ်သိရှိသူ အမျိုးသားတစ်ဦးက ပြောပါတယ်။
“၂ လုံး ချသွားတယ်။ ပါရမီ လက်ဖက်ရည်ဆိုင်ပေါ်တည့်တည့် ကျလာတယ်။ သူတို့ဆိုင်လည်း ပြိုသွားတယ်။ အိမ်လည်း အကုန်မီးလောင်သွားတယ်။ အကြော်ဆရာတစ်ယောက်ပဲ လွတ်သွားတယ်။ ကျန်တဲ့သူတွေက မသိရသေးဘူး။ အခုမီးသတ်ကားတွေ သူတို့အိမ် မီးလာငြိမ်းပေးနေတယ်။ ဒဏ်ရာရတဲ့သူက များတယ်။ အတိအကျ မသိရသေးဘူး” လို့ ပြောပါတယ်။
ထိခိုက်သေဆုံးသူနဲ့ ဒဏ်ရာရသူရဲ့ အချက်အလက် အသေးစိတ် သိရဖို့ ရွှေဖီမြေက ဆက်လက် စုံစမ်းနေဆဲ ဖြစ်ပါတယ်။
မန္တလေးတိုင်း ပြင်ဦးမြို့ကနေ နောင်ချိုမြို့ထဲ ဟောင်ဝှစ်ဇာ လက်နက်ကြီးနဲ့ ပစ်ခတ်တာရှိသလို နောင်ချိုမြို့နယ် ညောင်ထောက်ရွာကနေလည်း လက်နက်ကြီး ပစ်ခတ်တိုက်ခိုက်တာတွေ ပြုလုပ်ခဲ့တယ်လို့ ၎င်းက ဆိုပါတယ်။
မနေ့ ဇန်နဝါရီ ၂၁ ရက်ကလည်း နောင်ချိုမြို့ရှိ ထွေအုပ်ရုံးအနီး လေယာဉ်နဲ့ ဗုံးကြဲတိုက်ခိုက်ခဲ့လို့ အမျိုးသမီးတစ်ဦး သေဆုံးပြီး တစ်ဦး ထိခိုက်ဒဏ်ရာ ရရှိခဲ့ပါတယ်။
