မိုင်းပန်ပျော်၊ ဧပြီ ၅ ရက်၊ လားရှိုး
ကိုးကန့်တပ်မတော်- MNDAA ထိန်းချုပ်ထားတဲ့ ရှမ်းမြောက် လားရှိုးမြို့မှာ ဆိုင်တစ်ဆိုင် ဓားပြ ထပ်တိုက်ခံခဲ့ရတယ်လို့ သိရပါတယ်။
ဖြစ်စဉ်ဟာ ဒီနေ့မနက် ၆ နာရီကျော်က လားရှိုးမြို့ ရပ်ကွတ် ၁ နယ်မြေ ၉ လမ်းသွယ် ၅ မှာရှိတဲ့ နေအိမ်တစ်ခုမှာ အမျိုးသား ၄ ဦးက ဓားပြ ဝင်တိုက်ခဲ့တာလို့ ဒေသခံ အမျိုးသားတစ်ဦးက ရွှေဖီမြေကို ပြောပါတယ်။
“သိသလောက်ကတော့ ဒီနေ့ ရပ်ကွက်ထဲမှာ ဓားပြ တိုက်သွားတာ စတိုးဆိုင်ပိုင်ရှင်အိမ်ပေါ့။ ကားနဲ့ဖုန်း ပါသွားတယ် ပြီးတော့ မီးခံသေတ္တာလည်း အလုံးလိုက် မ သွားတယ်”
ဓားပြ တိုက်ခံရတဲ့အချိန် ဖုန်းရဲ့ Password လည်း ပြောခိုင်းပြီး အဲဒီဖုန်းကနေတဆင့် K-Pay တွေ လိုက်လိမ်နေတယ်လို့လည်း ၎င်းက ဆက်ပြောပါတယ်။
လားရှိုးမြို့မှာ ပြီးခဲ့တဲ့ ဧပြီ ၂ ရက်ကလည်း သေနတ် ကိုင်ဆောင်တဲ့ လူငယ် ၅ ဦးက လားရှိုးမြို့ ရပ်ကွက် ၁၀ ထဲက ဆိုင်တစ်ခုကို ဓားပြတိုက်ခဲ့တဲ့ဖြစ်စဉ် ဖြစ်ပွားခဲ့ဖူးပါတယ်။
လားရှိုးမြို့ကို စစ်ကောင်စီထံ ကိုးကန့်တပ်က ပြန်လည် လက်လွှဲပေးမယ်ဆိုတဲ့သတင်း ထွက်ပေါ်ပြီးနောက် ဓားပြတိုက်မှုတွေ ဆက်ဖြစ်လာမှာကို လူထုတွေက စိုးရိမ်နေကြပါတယ်။
