ယာရူစိင်၊ ဇူလိုင် ၁၈ ရက်၊ တာချီလိတ်
ရှမ်းအရှေ့ တာချီလိတ်မြို့ ညစျေးတန်းရှိ ဆိုင်ခန်းပေါ်ကို သစ်ပင်လဲကျတာကြောင့် ဒေသခံ ၄ ဦးဒဏ်ရာရရှိခဲ့တယ်လို့ တာချီလိတ်မြို့ခံတစ်ဦးက ရွှေဖီမြေကို ပြောပါတယ်။
ပြီးခဲ့တဲ့ ဇူလိုင် ၁၆ ရက်က မိုးအဆက်မပြတ်ရွာသွန်းနေပြီး တာချီလိတ်မြို့ ညစျေးတန်းရှိ ဆိုင်ခန်းအပေါ်ကို ကုက္ကိုလ်ပင်တစ်ပင် လဲကျခဲ့တာကြောင့် အမျိုးသမီး ၂ ဦးနဲ့ အမျိုးသား ၂ ဦးတို့က ဒဏ်ရာရရှိခဲ့တယ်လို့ ဆိုပါတယ်။
တာချီလိတ်မြို့ခံ တစ်ဦးက” အဲနေ့က မိုးလည်း အရမ်းကြီးတယ်။ မိုးရွာ လေတိုက်ဆိုတော့ သစ်ပင်လဲကျသွားတာပေါ့။ ဒဏ်ရာက မပြင်းထန်ဘူးလို့တော့ကြားတယ်။ တာချီလိတ်မှာကျ မိုးမရွာလည်း တောင်ကျရေကြောင့် ရေကြီးတယ်။ ဒီတလောတော့ မိုး ဆက်တိုက်ရွာတော့ ရပ်ကွက်တချို့တွေမှာ ရေကြီးတာတွေတော့ ဖြစ်တယ်။ ဒီနေ့တော့ ရေကျသွားပြီ။ လမ်းသွားလာလို့ အဆင်ပြေတဲ့အခြေအနေတော့ ရှိပြီပေါ့”လို့ ပြောပါတယ်။
မနေ့ ဇူလိုင် ၁၇ ရက် ညနေအချိန်ကလည်း တာချီလိတ်မြို့ရှိ ပုန်းထွန်၊ တာလော့၊ မကာဟိုခမ်း၊ ဆန်းဆိုင်၊ မယ်ခေါင်ရပ်ကွက်တွေနဲ့ လမ်းတချို့မှာလည်း မိုးရွာသွန်းမှုကြောင့် ရေတက်လာတာတွေ့ရှိရတယ်လို့ ရှမ်းအရှေ့သတင်းမဏ္ဍိုင်မှာ ဖော်ပြထားပါတယ်။
တာချီလိတ်မြို့မှာ ရေကြီးရေလျှံမှုနဲ့ ရေထဲမျှောပါပြီး သေဆုံးတာတွေလည်း မကြာခဏ ဖြစ်ပွါးနေပါတယ်။
ပြီးခဲ့တဲ့ မေလ ၂၅ ရက်ကလည်း မိုးအဆက်မပြတ် ရွာသွန်းမှုကြောင့် မယ်ဆိုင်ချောင်းမှာ အမျိုးသား ၁ ဦး ရေထဲ မျှောပါပြီး သေဆုံးတဲ့ဖြစ်စဉ် ဖြစ်ပွါးခဲ့ပါတယ်။
ရွှေဖီမြေ သတင်းတွေကို Facebook နဲ့ Website အပြင် အောက်ဖော်ပြပါ ချန်နယ်တွေမှာလည်း ဝင်ရောက် ဖတ်ရှုနားဆင်နိုင်ပါတယ်။
