ရဲမာန်၊ နိုဝင်ဘာ ၄ ရက်၊ ပေါက်
မကွေးတိုင်း ပေါက်မြို့နယ် ချက်ကန်ရွာထဲ စစ်ကြောင်းထိုးပြီး လူထုပိုင် တိရိစ္ဆာန်တွေကို ဝင်ရောက် ဖမ်းဆီးနေတဲ့ စစ်ကောင်စီတပ်ဖွဲ့ဝင် ၃ ဦးကို လက်နက်နဲ့အတူ အရှင်ဖမ်းဆီးရမိခဲ့တယ်လို့ သိရပါတယ်။
အဲဒီစစ်ကြောင်းဟာ ပြီးခဲ့တဲ့ အောက်တိုဘာ ၂၉ ရက်မှာ ဆိပ်ဖြူမြို့နယ်အခြေစိုက် ကာကွယ်ရေးပစ္စည်းစက်ရုံ(ကပစ) ၂၂ ကနေ ထွက်လာတဲ့တပ်မ ၉၉ လက်အောက်ခံတပ်ရင်းဖြစ်တဲ့ ၄၁၉၊ ၁၀၉၊ ၁၄ က အင်အား ၄၀၀ နဲ့ စစ်ကြောင်း ထိုးလာတာဖြစ်တယ်လို့ Young Revolution Front- YRF မှ ရုံးတာဝန်ခံ ကိုလွင်မိုးက ရွှေဖီမြေကို ပြောပါတယ်။
“ချက်ကန်ရွာက စာသင်ကျောင်းကို အောက်တိုဘာ ၃၁ ရက် မနက် ၄ နာရီမှာရောက်တယ်။ အဲအချိန်မှာ နားတဲ့သူက နား စာသင်ကျောင်းပတ်လည်က ပြည်သူပိုင် နေအိမ်တွေကို မီးရှို့တဲ့သူကရှို့ ကြက်ဝက် လိုက်ဖမ်းသူက ဖမ်း။ ကျနော်တို့ အနီးနားဝန်းကျင်က အိမ်တစ်အိမ်ကို စစ်ကောင်စီတပ်သား ၃ ဦး ရောက်လာတယ်။ သူတို့ကတော့ ကျနော့်အနီးနားကအိမ်ကို မီးရှို့သွားတာမဟုတ်ဘူး။ ကြက်တွေ လိုက်ဖမ်းနေတဲ့အချိန်မှာ ကျနော်တို့ ဝင်ရောက်ဖမ်းဆီးလိုက်တာပါ”
စစ်ကောင်စီတပ်သား ၃ ဦးကို ဝိုင်းဝန်းဖမ်းဆီးပြီးနောက် စစ်သား ၃ ဦးဆီကနေ သေနတ် ၂ လက်နဲ့ ကျည် ၁ ထောင်ကျော်ကို သိမ်းဆည်းရမိခဲ့တယ်လို့ ၎င်းက ဆက်ပြောပါတယ်။
စာသင်ကျောင်းမှာရှိတဲ့ စစ်ကြောင်းဟာ နိုဝင်ဘာ ၁ ရက် နေ့ခင်းပိုင်းမှာ ပေါက် တောင်ပိုင်းရှိ ပင်တောင်နဲ့ ဒီးဒုတ်ကွင်း ပျူစောထီးရွာ ၂ ရွာကို စစ်ကြောင်းတစ်ကြောင်းဆီ ခွဲထွက်သွားတယ်လို့ ၎င်းက ဆက်ပြောပါတယ်။
ဒီးဒုတ်ကွင်း ပျူစောထီးရွာကို ခွဲထွက်သွားတဲ့စစ်ကြောင်းဟာ YRF ထိန်းချုပ်နယ်မြေကို ဖြတ်သန်းသွားပြီးနောက် နယ်မြေရှင်းလင်းရေးလုပ်နေစဥ် YRF ထောင်ထားတဲ့မိုင်းကို နင်းမိပြီး သေဆုံးခဲ့တဲ့ စစ်သား ၂ ဦးရဲ့ အလောင်းနဲ့အတူ ကျောပိုးအိတ်၊ ကျည်ကာဦးထုပ်၊ ကျည်ဘောက်နဲ့ ကျည်တို့ကိုပါ တွေ့ခဲ့ရတယ်လို့ ၎င်းက ပြောပါတယ်။
~ ~ ~
ရွှေဖီမြေ သတင်းတွေကို Facebook နဲ့ Website အပြင် အောက်ဖော်ပြပါ ချန်နယ်တွေမှာလည်း ဝင်ရောက် ဖတ်ရှုနားဆင်နိုင်ပါတယ်။
