ရွှေဖီမြေ၊ မတ်လ ၆ ရက်၊ မိုးကုတ်
စစ်ကောင်စီတပ် ပြန်လည်ထိန်းချုပ်တဲ့ မန္တလေးတိုင်း မိုးကုတ်မြို့အနောက်ပိုင်းက ရွှေလိပ်ပြာဟိုတယ်မှာ အလုပ်လုပ်တဲ့ ရေဝေကျေးရွာက အမျိုးသား ၃ ဦး ပျောက်ဆုံးနေတယ်လို့ မိသားစုဝင်တွေက ရွှေဖီမြေကို ပြောပါတယ်။
ပြီးခဲ့တဲ့ ဇန်နဝါရီ ၈ ရက်ကတည်းက အဲဒီအမျိုးသား ၃ ဦးဟာ ရေဝေရွာကနေ ရွှေလိပ်ပြာဟိုတယ်ဘက် ပြန်သွားတဲ့အချိန် အဆက်အသွယ် ပြတ်တောက်သွားပြီး ဒီနေ့အထိ ၃ ဦးစလုံးနဲ့ အဆက်အသွယ်မရဘဲ ပျောက်ဆုံးနေတာလို့ ဆိုပါတယ်။
မိသားစုဝင်တစ်ဦးက “သူတို့ ၃ ယောက်က ရွှေလိပ်ပြာဟိုတယ်မှာ အလုပ်လုပ်တာ။ ဟိုတယ်ကနေ ခွင့် ၃ ရက်ယူပြီး အိမ်ပြန်လာတာ။ ခွင့်ရက်မပြည့်ခင် တစ်ရက်အလိုမှာ သူတို့ ၃ ယောက် ဟိုတယ်ကို ပြန်သွားတယ်။ အလုပ်ရှိတဲ့နေရာလည်း မရောက်သွားဘူး။ လေးငါးရက်အတွင်း သူတို့ အလုပ်ခွင်ထဲကလူ အိမ်အထိ ပြန်လာရှာတယ်။ အိမ်က မိသားစုကတော့ သူတို့အလုပ်ဘက် ရောက်သွားတာဘဲ ထင်နေကြတာ။ နောက်မှ ပျောက်သွားတယ်လို့ သိရတယ်” ဆိုပြီး ပြောပါတယ်။
ပျောက်ဆုံးသွားသူ အမျိုးသား ၃ ဦးဟာ အသက် ၂၇ နှစ် စိုင်းစံလင်း၊ ၂၄ နှစ်အရွယ် မောင်ဘဦးနဲ့ ၁၉ နှစ်အရွယ် မောင်ဟိန်းထက်ပိုင်ဆိုသူတို့ ဖြစ်ပါတယ်။
၎င်းတို့ ၃ ဦးကို မိတ်ဆွေဖြစ်သူတွေက မိုးကုတ်အနောက်ပိုင်း ကျောက်ဖာနားက စစ်တပ်ရဲ့ စစ်ဆေးရေးဂိတ်မှာ နောက်ဆုံး တွေ့ရှိခဲ့ပြီး အဲဒီကတည်းက ပျောက်ဆုံးသွားတာလို့ သိရပါတယ်။
ပျောက်ဆုံးနေတာနဲ့ ပတ်သက်ပြီး မိသားစုဝင်တွေ စိတ်ပူနေတာကြောင့် တွေ့ရှိတဲ့သူတွေအနေနဲ့ မိသားစုဝင်ဖုန်းဖြစ်တဲ့ 09-671 589 246 သို့ ဆက်သွယ်အကြောင်းပေးဖို့ မိသားစုဝင်တွေက တောင်းဆိုထားပါတယ်။
~ ~ ~
ရွှေဖီမြေ သတင်းတွေကို Facebook နဲ့ Website အပြင် အောက်ဖော်ပြပါ ချန်နယ်တွေမှာလည်း ဝင်ရောက် ဖတ်ရှုနားဆင်နိုင်ပါတယ်။
