လွေးထွေး၊ ဇန်နဝါရီ ၁၉ ရက်၊ မူဆယ်
တရုတ်-မြန်မာနယ်စပ် ရှမ်းမြောက် မူဆယ်မြို့မှာ ပြည်သူ့စစ်ဝတ်စုံ ဝတ်ထားတဲ့ အမျိုးသား ၃ ဦးက ကုန်စုံဆိုင်တစ်ခုထဲဝင်ပြီး ဆိုင်ရှင်အမျိုးသမီးကို ပြန်ပေးဆွဲသွားတယ်လို့ ဖြစ်စဉ်သိရှိသူ အမျိုးသားက ပြောပါတယ်။
မနေ့ ဇန်နဝါရီ ၁၈ ရက် ညပိုင်းမှာ မူဆယ်မြို့ ကောင်းမူးတုန်ရပ်ကွက်က ကုန်စုံဆိုင်ပိုင်ရှင် အမျိုးသမီးကို ၎င်းအမျိုးသား ၃ ဦးက သေနတ်ထောက် လက်ထိပ်ခတ်ပြီး ခေါ်ဆောင်သွားခဲ့ပါတယ်။
ဖြစ်စဉ်သိရှိသူ အမျိုးသားက “ဝတ်ထားတာက စစ်သားဝတ်စုံပေါ့။ သူတို့ပြောတာက ပြည်သူ့စစ်တဲ့။ မနေ့ညဖြစ်တာ။ ဆိုင်ရှင်ကိုခေါ်သွားတယ်။ အခုထိ ဘာမှန်းမသိရဘူး” လို့ ပြောပါတယ်။
၎င်းဖြစ်စဉ်ကြောင့် အဲဒီကုန်စုံဆိုင်ဟာ ဒီနေ့အထိ ပိတ်ထားပြီး ဆိုင်ရှင်လည်း ပြန်မလွှတ်လာသေးကြောင်း သူက ဆက်ပြောပါတယ်။
အလားတူ ပြီးခဲ့တဲ့ ဒီဇင်ဘာ ၂၁ ရက်ကလည်း မူဆယ်မြို့ ဟိုမွန်ရပ်ကွက်မှာ အမျိုးသမီးတစ်ဦးကို သေနတ်ထောက်ပြီး ကားကို ဓားပြတိုက်ခဲ့တဲ့ဖြစ်စဉ် ဖြစ်ပွားခဲ့ပါတယ်။
မူဆယ်မြို့မှာ လောင်းကစားရုံ၊ ကျားဖျန်ရုံ ပေါများပြီး မူးယစ်ဆေးဝါး အလွယ်တကူရနေတဲ့မြို့ ဖြစ်တဲ့အပြင် စစ်တပ်နဲ့ လက်နက်ကိုင် ပြည်သူ့စစ်ပေါင်းစုံ ရှိနေတာကြောင့် မကြာခဏ လူသတ်မှု၊ ဓားပြတိုက်မှု၊ ပြန်ပေးဆွဲမှု ဖြစ်ပွားနေပါတယ်။
