လွေးထွေး၊ မတ်လ ၂၆ ရက်၊ ပြင်ဦးလွင်
မန္တလေးတိုင်း ပြင်ဦးလွင်မြို့နယ်မှာ ဓားထိုး လုယက်မှုဖြစ်လို့ အမျိုးသား ၂ ဦး ပွဲချင်းပြီး သေဆုံးခဲ့တယ်လို့ ဖြစ်စဉ်ကို ကိုယ်တိုင်မြင်ခဲ့ရသူ အမျိုးသားတစ်ဦးရဲ့ ပြောပြချက်အရ သိရပါတယ်။
ဒီနေ့ မတ်လ ၂၆ ရက် မနက် ၁၀ နာရီခန့်က စစ်တပ် ထိန်းချုပ်ထားတဲ့ ပြင်ဦးလွင်မြို့နယ် လက်ပံကုန်းနဲ့ နမ့်ကပ်ရွာလမ်းကြား လမ်းမပေါ်မှာ အမျိုးသားတစ်ဦးရဲ့ဆိုင်ကယ်တစ်စီး ပါသွားတဲ့အပြင် ဦးခေါင်း ရိုက်ခံရတဲ့ ဒဏ်ရာနဲ့ ပွဲချင်းပြီး သေဆုံးပါတယ်။
အလားတူ နောက် ၅ ဖာလုံသာခြားတဲ့ နေရာမှာလည်း အမျိုးသားတစ်ဦး ချိုင်းအောက် ဓားထိုးခံခဲ့ရတဲ့ ဒဏ်ရာနဲ့ သေဆုံးနေတာကို တွေ့ရှိခဲ့ပါတယ်။
ဖြစ်စဉ်သိရှိသူ အမျိုးသားက “ဖြစ်စဉ်က နှစ်နေရာ သေတာကလည်း နှစ်ယောက်လုံးအမျိုးသားဘဲ။ ပြင်ဦးလွင်နဲ့ ၁၅ မိနစ်ဘဲ သွားရတာ” လို့ ပြောပါတယ်။
သေဆုံးသူ အမျိုးသားနှစ်ဦးဟာ အသက် ၃၀ နဲ့ ၂၀ ဝန်းကျင်အရွယ်သာရှိပြီး သူတို့ရဲ့နေရပ်ဒေသနဲ့ နာမည်ကို မသိရသေးဘဲ ပရဟိတအသင်းတွေကသာ သွားရောက်သယ်ဆောင်ပြီး ပြင်ဦးလွင် ပြည်သူ့ဆေးရုံသို့ ပို့ဆောင်ပေးခဲ့တယ်လို့ ဆိုပါတယ်။
စစ်ကောင်စီ ထိန်းချုပ်ထားတဲ့ ပြင်ဦးလွင်မြို့မှာ ဓားထိုးလုယက်မှုဖြစ်ပြီး သေဆုံးတာဟာ ပထမဆုံးအကြိမ်ဖြစ်ကြောင်း အထက်ပါ အမျိုးသားက ဆက်ပြောပါတယ်။
အလားတူဖြစ်စဉ်မျိုး စစ်ကောင်စီ ထိန်းချုပ်ထားတဲ့ နယ်စပ်မြို့ဖြစ်တဲ့ မူဆယ်မြို့မှာလည်း မကြာခဏ ဖြစ်ပွားနေပြီး မတ်လ ၂၄ ရက်ကလည်း ကောင်းမှုလွယ်ရပ်ကွက်မှာ အမျိုးသားတစ်ဦး ပြန်ပေးဆွဲခံခဲ့ရပါတယ်။
