မြတ်နိုး၊ ဖေဖော်ဝါရီ ၁၈ ရက်၊ မူဆယ်
စစ်ကောင်စီ ထိန်းချုပ်ထားတဲ့ မြန်မာ-တရုတ်နယ်စပ် မူဆယ်မြို့မှာ ဗန်းမော်မြို့ဘက်က လူငယ်အမျိုးသမီး ၁ ဦး KTV တွေမှာ အသုံးများတဲ့ စိတ်ကြွဆေးတစ်မျိုးဖြစ်တဲ့ K ဆိုတဲ့ အမှုန့်ကို အရှူလွန်ပြီး သေဆုံးသွားခဲ့တယ်လို့ ဒေသခံတွေဆီက သိရပါတယ်။
“ဗန်းမော်က မိန်းကလေးတစ်ယောက်ဘဲ။ K ရှူတာ လွန်သွားပြီးတော့ မူဆယ် ဆေးရုံမှာဘဲ ဆုံးသွားတာ” လို့ ဖြစ်စဉ်သိရှိတဲ့ ဒေသခံ တစ်ဦးက ရွှေဖီမြေကို ပြောပါတယ်။
သေဆုံးသွားတဲ့ အဲဒီအမျိုးသမီးဟာ အသက် ၂၃ နှစ်အရွယ်သာ ရှိသေးပြီး ပြီးခဲ့တဲ့ ဖေဖော်ဝါရီ ၁၆ ရက် မနက် ၁၀ နာရီမှာ သေဆုံးခဲ့တာလို့ ပြောပါတယ်။
“မူဆယ်မှာ မိန်းကလေးရော ယောက်ျားလေးရော K ရှူလို့ သေဆုံးတာ အရမ်းများလာပြီ။ မလွယ်တော့ဘူး။ အခုခေတ် မိန်းကလေးတချို့ KTV တွေမှာ K တွေ ရွှေတွေ ရှူပြီး က နေကြတာ တွေ့နေရတယ်။ ဒီမိန်းကလေးကတော့ ဘယ်လိုဖြစ်တာလဲတော့ မသိဘူး။ သူက K အကြောင်း သိပ်မသိတာလားတော့ မသိဘူး။ K ရှူမိတာနဲ့ မကပဲ နေလို့မရဘူး။ ပြုစုမယ့်သူ အဖော်မပါလာရင် အဲလို ဖြစ်တတ်တယ်” လို့ နောက်ထပ် ဒေသခံတစ်ဦးက ပြောပါတယ်။
မူဆယ်အပြင် ရှမ်းမြောက်ရှိ မြို့နယ်အများစုမှာ လူကို စိတ်ကြွစေတဲ့ K မှုန့်နဲ့ အရည်ဖျော်သောက်ရတဲ့ ရွှေတို့ဟာ KTV နဲ့ ကလပ်မှာ တရားဝင် အသုံးပြုနေကြပြီး အသုံးလွန်ပြီး သေဆုံးတာနဲ့ ဆေးရုံဆေးခန်းမှာ ဆေး သွားကုသရတဲ့ ဖြစ်စဉ်လည်း မကြာခဏ ဖြစ်ပွားနေပါတယ်။
အဲဒီစိတ်ကြွဆေးတွေ သုံးပြီး သေဆုံးတာတွေ မကြာခဏ ဖြစ်ပွားပေမဲ့ တိကျတဲ့ စာရင်းပြုစုတာတွေတော့ မရှိသေးပါဘူး။
