ပို့လဘား၊ ဖေဖော်ဝါရီ ၂၂ ရက်၊ နောင်ချို
တအာင်းတပ် ထိန်းချုပ်ထားတဲ့ ရှမ်းမြောက် နောင်ချိုမြို့မှာ စစ်ကောင်စီတပ်က ဗုံး ထပ်မံ ကြဲချတိုက်ခိုက်ခဲ့တာကြောင့် ဒေသခံ ၁ ဦး သေဆုံးသွားတယ်လို့ ဖြစ်စဉ်သိရှိသူ အမျိုးသားတစ်ဦးက ရွှေဖီမြေကို ပြောပါတယ်။
ဒီနေ့ ဖေဖော်ဝါရီ ၂၂ ရက် မနက်အစောပိုင်း ၁ နာရီဝန်းကျင်မှာ နောင်ချိုမြို့နယ် ရွှေမုဌောရွာကို Y-12 လေယာဉ်နဲ့ ဗုံး ၅ လုံး ကြဲချတိုက်ခိုက်ခဲ့တာလို့ ဆိုပါတယ်။
“Y-12 နဲ့ အသွား ၃ လုံး အပြန် ၂ လုံး ချသွားတာ။ ၅၅ နှစ်အရွယ်ရှိတဲ့ အမျိုးသမီးတစ်ဦးက အဲနေရာမှာတင် ပွဲချင်းသေဆုံးသွားတယ်။ ကျန်တာ ထိခိုက်မှု မရှိဘူး” လို့ ဖြစ်စဥ္သိရှိတဲ့ အမျိုးသားက ပြောပါတယ်။
တရုတ်နိုင်ငံ ကူမင်းမြို့မှာ စစ်ကောင်စီနဲ့ တအာင်းတပ်ရဲ့ တွေ့ဆုံဆွေးနွေးပွဲအပြီးမှာ စစ်တပ်က TNLA ထိန်းချုပ်ထားတဲ့ ဒေသတွေကို နေ့စဉ်လိုလို ဗုံးကြဲတိုက်ခိုက်လာနေတာ ဖြစ်ပါတယ်။
စစ်တပ်က နောင်ချိုမြို့ကို ပြီးခဲ့တဲ့ ဖေဖော်ဝါရီ ၁၉ ရက်ကနေ ဖေဖော်ဝါရီ ၂၁ ရက် သုံးရက်ဆက်တိုက် ဗုံးကြဲတိုက်ခိုက်ခဲ့တာကြောင့် အရပ်သား ၅ ဦး သေဆုံးခဲ့သလို ကလေးအပါအဝင် ၈ ဦး ဒဏ်ရာ ရရှိခဲ့ပြီး နေအိမ်နဲ့ဘုန်းကြီးကျောင်းဆောင် ထိခိုက်ပျက်စီးခဲ့ပါတယ်။
အလားတူ ပြီးခဲ့တဲ့ ဖေဖော်ဝါရီ ၂၀ ရက် ည ၈ နာရီကလည်း မိုးမိတ်မြို့နယ် ဝဲပေါင်ရွာကို စစ်တပ်က ဗုံးကြဲတိုက်ခိုက်ခဲ့တာကြောင့် ကလေးငယ်အပါအဝင် ဒေသခံ ၃ ဦး သေဆုံးပြီး ၉ ဦး ဒဏ်ရာ ရရှိခဲ့ပါတယ်။
စစ်တပ်ဟာ တိုက်ပွဲ ဖြစ်ပွားခြင်းမရှိဘဲ အရပ်သားတွေကို ရည်ရွယ်ချက်ရှိရှိ ဦးတည်ကာ ဗုံးကြဲတိုက်ခိုက်နေပြီး စစ်ရေးသတိ အမြဲရှိဖို့ လိုအပ်ပြီး လေကြောင်းရန် ကာကွယ်ရေးဆိုင်ရာ နည်းလမ်းတွေ လိုက်နာဖို့လည်း လိုအပ်တယ်လို့ TNLA က တိုက်တွန်းပြောဆိုထားပါတယ်။
