မိုင်းရူပ၊ နိုဝင်ဘာ ၂၅ ရက်၊ လားရှိုး
ရှမ်းမြောက် လားရှိုးမြို့ ရပ်ကွက် ၅ က ရေကန်တောင်မှာ မူးယစ်ဆေးဝါး သုံးစွဲသူတွေကို စစ်ကောင်စီတပ်က လိုက်လံပစ်ခတ်လို့ ၁ ဦး သေဆုံးပြီး ၂ ဦး ဒဏ်ရာရခဲ့တယ်လို့ လားရှိုးမြို့ခံတချို့က ရွှေဖီမြေကို ပြောပါတယ်။
ဒီနေ့ နိုဝင်ဘာလ ၂၅ ရက် မနက်ပိုင်းမှာ ရေကန်တောင်မှာရှိတဲ့ မူးယစ်ဆေးဝါး သုံးစွဲသူတွေကို စစ်ကောင်စီတပ်ဖွဲ့ဝင်တွေက လိုက်လံပစ်ခတ်ခဲ့တာဖြစ်ပြီး အဲဒီပစ်ခတ်မှုတွေကြောင့် အမျိုးသား ၁ ဦး သေဆုံးကာ ၂ ဦး ထိမှန်ဒဏ်ရာရခဲ့ပါတယ်။
“ဒီနေ့ ရေကန်တောင်မှာ တွေ့တဲ့သူ လိုက်ပစ်တဲ့ပုံစံပေါ့။ တချို့လည်း ဘိန်းစားဟုတ်ချင်ဟုတ်မယ်။ တချို့က မဟုတ်ဘူး။ စစ်တပ်က လိုက်ပစ်တာ။ ဒဏ်ရာရတာ ၂ ယောက်။ တစ်ယောက်က ဗိုက်ထိတယ်။ တစ်ယောက် ခြေထောက်ထိတယ်။ တစ်ယောက် သေသွားတယ်။ ပစ်ပြီးတော့မှ ဒီတိုင်းထားခဲ့တာ” လို့ ဖြစ်စဥ်သိရသူ လားရှိုးမြို့ခံ အမျိုးသားတစ်ဦးက ရွှေဖီမြေကို ပြောပါတယ်။
လားရှိုး ရေကန်တောင်မှာ စစ်ကောင်စီတပ်နဲ့ ၎င်းရဲ့ လက်အောက်ခံ ရဲတပ်ဖွဲ့တွေက မူးယစ်ဆေးဝါးသုံးစွဲသူတွေကို မကြာခဏ လာရောက်စစ်ဆေးတာတွေ ပြုလုပ်နေပြီး ငွေတောင်းတာတွေ မကြာခဏပြုလုပ်တဲ့ နေရာလည်း ဖြစ်ပါတယ်။
ပြီးခဲ့တဲ့ နိုဝင်ဘာ ၅ ရက်မှာလည်း ရေကန်တောင်ရှိ နေအိမ်တစ်အိမ်မှာ စစ်ကောင်စီရဲ့ ရဲတပ်ဖွဲ့ဝင် ၃ ဦးက ကားတစ်စီးနဲ့ ရောက်လာပြီး နေအိမ်အတွင်း မူးယစ်ဆေးဝါးရှိမရှိ ဝင်ရောက်စစ်ဆေးရာ ငွေသိန်း၂၀ ကျော် တောင်းခံသွားတဲ့ဖြစ်စဥ်လည်း ရှိခဲ့ပါတယ်။
လားရှိုးမြို့ ရပ်ကွက် (၅) ရှိ ရေကန်တောင်မှာ မူယစ်ဆေးဝါး သုံးစွဲသူတွေ ကျက်စားရာနေဖြစ်ပြီး မူယစ်ဆေးကြောင့် သေဆုံးနေတဲ့ ပိုင်ရှင်မဲ့အလောင်းတွေ မကြာခဏ တွေ့တဲ့နေရာလည်း ဖြစ်ပါတယ်။
လားရှိုးမြို့ကို ကိုးကန့်တပ်တွေ ထိန်းချုပ်စဥ် ရေကန်တောင်ဖက်မှာ မူးယစ်ဆေးသုံးစွဲသူတွေ နည်းပါးလာပေမယ့် လားရှိုးကို စစ်ကောင်စီပြန်ရပြီးနောက် မူးယစ်ဆေးဝါး သုံးစွဲမှုတွေ ပြန်ပေါများလာတာ ဖြစ်ပါတယ်။
တရုတ်နိုင်ငံရဲ့ ကြားဝင်စေ့စပ်မှုကြောင့် ကိုးကန့်တပ် MNDAA ထိန်းချုပ်ထားတဲ့ လားရှိုးမြို့ပေါ်က နေရာတွေကို ပြီးခဲ့တဲ့ ဧပြီလထဲမှာ စစ်ကောင်စီထံ ပြန်လည်လွှဲပြောင်းပေးခဲ့ရတာ ဖြစ်ပါတယ်။
~ ~ ~
ရွှေဖီမြေ သတင်းတွေကို Facebook နဲ့ Website အပြင် အောက်ဖော်ပြပါ ချန်နယ်တွေမှာလည်း ဝင်ရောက် ဖတ်ရှုနားဆင်နိုင်ပါတယ်။
