မိုင်းရူပ၊ သြဂုတ် ၂၃ ရက်၊ ကျောက်မဲ
တအာင်းတပ်မတော် (PSLF/TNLA) ထိန်းချုပ်ထားတဲ့ ကျောက်မဲမြို့နယ် မိုင်းငေါ့မြို့က ကွန်စလမ်းကျေးရွာ ဘုန်းကြီးကျောင်းကို စစ်တပ်က ဗုံးကြဲတိုက်ခိုက်ခဲ့ရာက ကလေးတစ်ဦး သေဆုံးပြီး သံဃာ ၂ ပါး ဒဏ်ရာရခဲ့တယ်လို့ သိရပါတယ်။
“ကိုရင်တစ်ပါး ခြေထောက်မှာ ဒဏ်ရာရတယ်။ တစ်ပါးကတော့ ဒဏ်ရာ ပြင်းထန်ပြီး စိုးရိမ်ရတဲ့ အခြေအနေပါ။ ကလေးတစ်ယောက်ကတော့ သေဆုံးသွားပါပြီ” လို့ မြေပြင်အခြေအနေ သိရှိသူတစ်ဦးက ရွှေဖီမြေ ကို ပြောပါတယ်။
ဒီနေ့ သြဂုတ် ၂၃ ရက် နေ့လယ် ၃ နာရီခွဲဝန်းကျင်မှာ စစ်ကောင်စီတပ်က ဂျက်လေယာဉ်နဲ့ ပေါင် ၅၀၀ ဗုံးတစ်လုံးနဲ့ ကွန်စလမ်းရွာက ဘုန်းကြီးကျောင်းထဲကို ဗုံးကြဲချခဲ့တာ ဖြစ်ပါတယ်။
သေဆုံးသွားသူဟာ အသက် ၁၀ နှစ်ဝန်းကျင်ရှိတဲ့ မောင်အာကာဖြိုးဆိုသူဖြစ်ပြီး စစ်တပ်ရဲ့ ဗုံးကြောင့် ဘုန်းကြီးကျောင်းတစ်ခုလုံးလည်း ပျက်စီးခဲ့ပါတယ်။
တစ်ဖက်မှာလည်း ကျောက်မဲမြို့နယ် နောင်ပိန်ရွာအနီးမှာ စစ်တပ်နဲ့ TNLA အကြား တိုက်ပွဲတွေ ဆက်လက်ပြင်းထန်နေပြီး စစ်တပ်ရဲ့ ဗုံးကြဲတိုက်ခိုက်မှုကြောင့် အရပ်သား သေဆုံးမှုတွေ ဆက်ရှိနေပါတယ်။
စစ်ကောင်စီတပ်က PSLF/TNLA ထိန်းချုပ်ထားတဲ့ ဒေသတွေမှ လေယာဉ်နဲ့ ဆက်တိုက် ဗုံးကြဲတိုက်ခိုက်နေပြီး လူထုတွေအနေနဲ့ စစ်ရေးသတိရှိထားဖို့ TNLA က တိုက်တွန်းထားပါတယ်။
ရွှေဖီမြေ သတင်းတွေကို Facebook နဲ့ Website အပြင် အောက်ဖော်ပြပါ ချန်နယ်တွေမှာလည်း ဝင်ရောက် ဖတ်ရှုနားဆင်နိုင်ပါတယ်။
