ပို့လဘား၊ ဇွန်လ ၂၅ ရက်၊ နောင်ချို
တိုက်ပွဲပြင်းထန်နေတဲ့ ရှမ်းမြောက် နောင်ချိုမြို့နယ်မှာ စစ်ကောင်စီတပ်က တစ်ရက်အတွင်း ဗုံး ၁၉၀ လုံး ကြဲချတိုက်ခိုက်ခဲ့တယ်လို့ တအာင်းတပ် TNLA က ထုတ်ပြန်ထားပါတယ်။
နောင်ချိုမြို့နယ်ရှိ နောင်သြ၊ လက်ပန်ကုန်း၊ ရွှေသွန်း၊ မျက်ချီးနု၊ လုံစံ၊ ကုန်းသာ၊ အုမ္မသီးနဲ့ ဆမ္မဆယ်ကျေးရွာတွေမှာ စစ်ကောင်စီတပ်နဲ့ TNLA၊ပူးပေါင်းတပ်တို့အကြား တိုက်ပွဲဖြစ်ပွားပြီး စစ်ကောင်စီတပ်ဟာ မနေ့ ဇွန်လ ၂၄ ရက် တစ်ရက်အတွင်း လေကြောင်းကနေ ဗုံး ၁၃၀လုံး၊ ဒရုန်း ၆၀လုံး စုစုပေါင်း ဗုံးအလုံး ၁၉၀နဲ့ လက်နက်ကြီး ၅၃ လုံး ပစ်ကူတိုက်ခိုက်ခဲ့တယ်လို့ ဖော်ပြထားပါတယ်။
“မနက်ကတည်းက လက်နက်ကြီးတွေနဲ့ ဆက်တိုက်ပဲ။ ဒီနေ့ ဆမ္မဆယ်ရွာတော့ ငြိမ်နေတယ်။ လက်နက်ကြီးသံတွေ မကြားရဘူး။ မျက်ချင်းနုနားမှာ စကစတွေ ရောက်နေပြီ။ ဟိုနေ့ စကစတွေထိုးလာတာ သူတို့ဘက် အထိုက်အခိုက်များတယ်”လို့ စစ်မြေပြင်သိရှိသူ အမျိုးသမီးတစ်ဦးက ပြောပါတယ်။
ပြီးခဲ့တဲ့ ဇွန်လ ၂၃ ရက်ကလည်း နောင်ဩအောကျေးရွာမှာ တိုက်ပွဲဆက်လက်ဖြစ်ပွားခဲ့ပြီး တိုက်ပွဲအတွင်း စစ်ကောင်စီတပ်က လေကြောင်းနဲ့ ဗုံး ၄၂ လုံး၊ ဒရုန်းနဲ့ ဗုံး ၂၁ လုံး၊ လက်နက်ကြီး ၁၇ လုံး ပစ်ကူတိုက်ခိုက်ခဲ့သေးပါတယ်။
ဒါ့အပြင် ပြီးခဲ့တဲ့ ဇွန် ၂၃ရက်ကလည်း နောင်ချိုမြို့နယ်အတွင်း စစ်ကောင်စီတပ်နဲ့ TNLA၊ပူးပေါင်းတပ်တို့ တိုက်ပွဲဖြစ်ပွားခဲ့ပြီး စစ်ကောင်စီတပ်က ဗုံး ၄၇လုံးနဲ့ လက်နက်ကြီး ၁၂၂ လုံးနဲ့ တိုက်ခိုက်ခဲ့ပါတယ်။
လက်ရှိ နောင်ချိုမှာ စစ်ကောင်စီနဲ့TNLAပူးပေါင်းတပ်တို့ တိုက်ပွဲအပြင်းအထန်ဆက်ဖြစ်နေပြီး ၂ဖက်အထိအခိုက်များနေတယ်လို့ မြေပြင်သတင်းအရင်းမြစ်တွေက ပြောပါတယ်။
စစ်ကောင်စီတပ်ဟာ နောင်ချိုမြို့ကို ပြန်လည်ထိန်းချုပ်ဖို့ အင်အားထောင်ချီအသုံးပြုပြီး စစ်ကြောင်းထိုးနေတာ ဖြစ်ပါတယ်။
ရွှေဖီမြေ သတင်းတွေကို Facebook နဲ့ Website အပြင် အောက်ဖော်ပြပါ ချန်နယ်တွေမှာလည်း ဝင်ရောက် ဖတ်ရှုနားဆင်နိုင်ပါတယ်။
