မိုင်းအရှိုင်း၊ ဇွန်လ ၁၆ ရက်၊ ကျောက်မဲ
တအာင်းတပ် ထိန်းချုပ်ထားတဲ့ ကျောက်မဲမြို့နယ် ဟူးစွန်ကျေးရွာမှာ တအာင်းတပ်- TNLA နဲ့ ရှမ်းတပ်- SSPP တို့အကြား အပြန်အလှန် ပစ်ခတ်မှု ဖြစ်ပွားခဲ့တယ်လို့ ဒေသခံတွေက ရွှေဖီမြေကို ပြောပါတယ်။
ဖြစ်စဉ်ဟာ မနေ့ ဇွန်လ ၁၅ ရက် ညနေ ၅ နာရီဝန်းကျင်မှာ စတင်ဖြစ်ပွားခဲ့တာဖြစ်ပြီး TNLA က မူလအထိုင်စခန်းဖြစ်တဲ့ ဟူးစွန်တောင်ပေါ်ရှိ တပ်စခန်းနေရာဘက် တက်လာချိန် SSPP ဘက်က လက်နက်အသေးစားနဲ့ စတင်ပစ်ခတ်ရာကနေ တိုက်ပွဲ ဖြစ်ပွားခဲ့တာလို့ ရှေ့တန်း သတင်းရင်းမြစ်တစ်ဦးက ရွှေဖီမြေကို အတည်ပြု ပြောဆိုပါတယ်။
“မနေ့ညနေ ၅ နာရီ စဖြစ်တာ။ SSPP ဘက်က သေနတ်အသေးစားသုံးပြီး စပစ်တာ။ ကျနော်တို့လူ အဲဒါ ပြန်မပစ်သေးဘူး။ လက်နက်အကြီးနဲပါ သူတို့က ပစ်လိုက်တော့ ကျနော်တို့ ပြန်ပစ်လိုက်တယ်။ ကျနော်တို့လူ ၄ ယောက် ထိလို့ ဒဏ်ရာ ပြင်းထန်တယ်”
ပစ်ခတ်မှုက ညနေ ၅ နာရီကနေ ၉ နာရီဝန်းကျင်အထိ ၄ နာရီကြာ ဖြစ်ပွားခဲ့ကာ TNLA ဘက်က ၄ ဦး ထိမှန်ဒဏ်ရာ ရခဲ့ပြီးတော့ SSPP ဘက်ကလည်း ထိခိုက်မှု ရှိတယ်လို့ သူက ပြောပါတယ်။
၁၀၂၇ စစ်ဆင်ရေး စတင်ပြီးနောက်ပိုင်း TNLA က အဲဒီစခန်းတွေမှာ အထိုင်မချနိုင်တဲ့အချိန် SSPP တပ်က ဝင်ရောက် အထိုင်ချကာ TNLA က စခန်းဘက် ပြန်တက်လာချိန်မှာ ပစ်ခတ်မှု ဖြစ်ပွားခဲ့တယ်လို့ ဒေသခံတစ်ဦးက ရွှေဖီမြေကို ပြောပါတယ်။
“SSPP က ဟူးစွန်စခန်းကုန်းထဲ ဝင်ထိုင်တယ်။ အရင်က အဲဒါ TNLA တပ်စခန်းတွေပါ။ အောက်ဖက်တွေမှာ တိုက်ပွဲဖြစ်တော့ အဲစခန်းမှာ သူတို့ မနေဖြစ်ဘူး။ အခု TNLA အဲနေရာကို ပြန်တက်လာတာ”
လက်ရှိအချိန်ထိ ပစ်ခတ်မှု ဖြစ်ပွားတာနဲ့ပက်သက်ပြီး နှစ်ဖက်တပ်က တရားဝင် ထုတ်ပြန်တာ မရှိသေးဘဲ ရွှေဖီမြေအနေနဲ့လည်း ဆက်သွယ်ဖို့ ကြိုးစားနေပါတယ်။
အဲဒီ ဟူးစွန်တပ်စခန်းကုန်းဟာ ရှမ်းပြည်ပြန်လည်ထူထောင်ရေးကောင်စီ- RCSS ရဲ့ တပ်စခန်းကုန်းဖြစ်ပြီး RCSS နဲ့ ဖြစ်ပွားခဲ့တဲ့ တိုက်ပွဲမှာ TNLA ဘက်က ထိခိုက်ကျဆုံးမှု များခဲ့တဲ့နေရာလည်း ဖြစ်ပါတယ်။
ရွှေဖီမြေ သတင်းတွေကို Facebook နဲ့ Website အပြင် အောက်ဖော်ပြပါ ချန်နယ်တွေမှာလည်း ဝင်ရောက် ဖတ်ရှုနားဆင်နိုင်ပါတယ်။
