လွေးလာဝ်ဇာရ်၊ ဇွန်လ ၁၁ ရက်၊ မူဆယ်
ရှမ်းမြောက် မူဆယ်မြို့ မန်မိုင်ရပ်ကွက်မှာ နေထိုင်တဲ့ အမျိုးသားတစ်ဦးကို ရှမ်းပြည်တိုးတက်ရေးပါတီ SSPP တပ်က ဖမ်းဆီးခေါ်ဆောင်သွားပြီး သိန်း ၂၀ နဲ့ ပြန်ရွေးခဲ့ရတယ်လို့ ဖမ်းဆီးခံရသူနဲ့ နီးစပ်သူတစ်ဦးက ရွှေဖီမြေကို ပြောပါတယ်။
ပြီးခဲ့တဲ့ ဇွန်လ ၄ ရက်မှာ မူဆယ်ကနေ ပန်ဆိုင်း(ကြူကုတ်)ဘက်ကို သွားတဲ့ အဲဒီအမျိုးသားကို SSPP တပ်က သီပေါဘက်ကို လိုက်ပို့ခိုင်းပြီး ပြန်မလွတ်ပေးတော့ဘဲ ငွေ သိန်း ၃၀၀ နဲ့ ပြန်ရွေးခိုင်းခဲ့ပေမဲ့ မိသားစုတွေက ပြန်လည်တောင်းပန်ခဲ့တာကြောင့် သိန်း ၂၀ နဲ့သာ ပြန်ရွေးခဲ့တယ်လို့ ဆိုပါတယ်။
ဖမ်းဆီးခံရသူနဲ့ နီးစပ်သူတစ်ဦးက “အစကသိန်း ၃၀၀ နဲ့ ပြန်ရွေးခိုင်းတာ။ မိသားစုဝင်တွေက ညှိရင်းညှိရင်း သိန်း ၂၀ လွှဲပေးပြီးတော့မှ ပြန်လွှတ်ပေးတာ။ အဓိက သူတို့ပိုက်ဆံ လိုချင်လို့ဘဲလေ။ သူ့ကိုလိမ်ပြီး ခေါ်သွားတာ။ စစဖမ်းထားတုန်းက လက်နက်ကိုင်အဖွဲ့မှန်း သိတယ်။ ဘယ်အဖွဲ့လည်းဆိုတာ သူမပြောရဲဘူး။ သူဖုန်းနဲ့ သူတို့အိမ်ကို ပိုက်ဆံလှန်းတောင်းခိုင်းတာတော့ သိရတာ” လို့ ပြောပါတယ်။
ဖမ်းဆီးခေါ်ဆောင်သွားခံရတဲ့ အဲဒီအမျိုးသားဟာ အသက် ၃၁ နှစ်အရွယ်ရှိတဲ့ ဦးရန်ချောက်ဒိန်းဖြစ်ပြီး သူ့ကိုတော့ ဇွန်လ ၉ ရက်မှာ SSPP တပ်ထံ သိန်း ၂၀ ပေးပြီး ပြန်ရွေးခဲ့ရတာလို့ အထပ်ပါ အမျိုးသားက ဆက်ပြောပါတယ်။
“သူက မူဆယ်ကနေ ပန်ဆိုင်းဘက်ကိုသွားတာ။ အဲကြားမှာဘဲ SSPP တို့နဲ့ သွားတွေ့တာ။ သူတို့ကို သီပေါဘက် လိုက်ပို့ခိုင်းတာ။ စစ်သားဆိုတော့ မပို့ရအောင်လည်း မဟုတ်။ သီပေါရောက်တော့ ကားရော၊ လူရော သူတို့က ပြန်မလွတ်ပေးတော့ဘူး။ မနေ့ကမှ သိန်း ၂၀ ပေးပြီးမှ ပြန်လွှတ်ပေးတာ” လို့ ပြောပါတယ်။
အဲဒီအမျိုးသား ဖမ်းဆီးခံထားရစဥ်မှာ ရိုက်နှက်ခံရတာ ရှိမရှိကိုတော့ ရွှေဖီမြေအနေနဲ့တော့ မသိရပါဘူး။
အဆိုပါကိစ္စနဲ့ ပတ်သက်ပြီး ထပ်မံသိရှိရဖို့ကို ရှမ်းတပ် SSPP ရဲ့ ပြောရေးဆိုခွင့်ရှိသူ ဗိုလ်မှူးစိုင်းဖုန်းဟန်ကို ရွှေဖီမြေက ဖုန်းနဲ့ စာပို့ ဆက်သွယ်ခဲ့ပေမယ့် မရခဲ့ပါဘူး။
ရွှေဖီမြေ သတင်းတွေကို Facebook နဲ့ Website အပြင် အောက်ဖော်ပြပါ ချန်နယ်တွေမှာလည်း ဝင်ရောက် ဖတ်ရှုနားဆင်နိုင်ပါတယ်။
