လွေးဇွန်မိုး၊ ဒီဇင်ဘာ ၁၆ ရက်၊ နမ္မတူ
တအာင်းတပ် TNLA ထိန်းချုပ်ထားတဲ့ နမ္မတူမြို့နယ် ပန်ဆော့ကျေးရွာအုပ်စုက ကျေးရွာတစ်ခုမှာ အသက် ၉ နှစ်အရွယ် အမျိုးသမီးငယ်တစ်ဦးကို အိမ်နီးချင်းဖြစ်သူ အသက် ၂၂ အရွယ် အမျိုးသားတစ်ဦးက အဓမ္မပြုကျင့်ခဲ့တယ်လို့ ပြုကျင့်ခံရသူရဲ့ မိသားစုဝင်တွေစီက သိရပါတယ်။
ပြီးခဲ့တဲ့ ဒီဇင်ဘာ ၇ ရက် ည ၁၀ နာရီဝန်းကျင်မှာ လွေးအီ(အမည်လွှဲ)တို့ရဲ့ နေအိမ်မှာ ရပ်ရွာအစည်းအဝေးပြုလုပ်နေစဥ် နေအိမ်အပေါ်ထပ်ရှိ အိပ်ခန်းမှာ အိပ်ပျော်နေတဲ့ လွေးအီကို အောင်ကျိုးဆိုသူက အဓမ္မပြုကျင့်ခဲ့တယ်လို့ လွေးအီရဲ့ မိခင်ဖြစ်သူက ပြောပြပါတယ်။
“ကျမတို့က သိန္နီဘက်မှာနေတာလေ။ သိန္နီမှာ ကျောင်းမဖွင့်တော့ ကျမသမီးတွေ ကျောင်းတက်လို့ရအောင်ဆိုပြီး သူ့အဖိုးတို့စီလာထားတာပေါ့။ အဲနေ့က သူ့အဖိုးရဲ့ အိမ်အောက်ထပ်မှာ အစည်းအဝေးလုပ်ကြတာတဲ့။ သူ့အဖွားက ဟင်းခဏစောအုံးမယ်ဆိုပြီး သူတို့ညီအစ်မနှစ်ယောက်ကို အရင်တက်အိပ်ခိုင်းတာ။ ကလေးတွေက အိပ်ပျော်နေပြီလေ။ သူတံခါးဖွင့်တဲ့အချိန်တောင် မတွေ့ဘူးတဲ့။ ဖြစ်ပြီးမှ ကလေး ၂ ယောက်က အောက်ထပ်ကို ငိုပြီးဆင်းလာကြတာ။ အဲချိန် ရွာကော်မတီတွေတောင် မပြန်ကြသေးဘူး။ သူတို့က ကလေးတွေကို မေးကြည့်တော့မှ အဓမ္မပြုကျင့်ခံရမှန်းသိရတာ။ ဖြစ်တဲ့အချိန် ကလေးတွေက အိမ်ပေါ်ကနေ သူတို့အဖွားကို အော်ခေါ်ပေမယ့် အောက်မှာက ဆူညံနေတော့ သူ့အဖွားက မကြားဘူးတဲ့။ ကျမစိတ်နဲ့ဆို အဲကောင်ကို သတ်ပစ်လိုက်ချင်တယ်”
အောင်ကျိုးဆိုသူဟာ လွေးအီတို့နဲ့ အိမ်နီးချင်းဖြစ်ပြီး အဓမ္မပြုကျင့်မှုဖြစ်စဥ်မတိုင်ခင်မှာလည်း လွေးအီရဲ့ ခန္ဓာကိုယ်အစိတ်အပိုင်းကို ထိတွေ့ကိုင်သွယ်တာတွေ လုပ်ခဲ့ဖူးတယ်လို့ ဆိုပါတယ်။
လွေးအီရဲ့ မိဘတွေကတော့ ကျူးလွန်သူ အမျိုးသားကို ထိုက်သင့်တဲ့ပြစ်ဒဏ်ပေးပြီး တရားဥပဒေအတိုင်း အရေးယူပေးစေချင်တယ်လို့ ပြောပါတယ်။
“ကျတော်ကတော့ တရားဥပဒေအတိုင်းပဲ အရေးယူပေးစေချင်တယ်။ ကျနော်တို့ စိတ်လိုက်မာန်ပါလည်း တုံ့ပြန်လို့မရဘူးဆိုတော့။ တရားခံဘက်က ကျတော်တို့ကို ငွေကြေးနဲ့ပဲ ကျေးအေးပေးဖို့ တောင်းပန်လာရင်တောင် ကျတော်တို့ဘက်ကတော့ ခွင့်လွှတ်မပေးနိုင်ဘူး” လို့ လွေးအီရဲ့ ဖခင်ဖြစ်သူက ပြောပါတယ်။
လက်ရှိမှာတော့ အဓမ္မပြုကျင့်သူ အမျိုးသားကို TNLA ရဲ့ နမ္မတူမြို့နယ် ရဲတပ်ဖွဲ့က ဖမ်းဆီးထိန်းသိမ်းထားပြီး တရားဥပဒေအတိုင်း အရေးယူဆောင်ရွက်သွားမယ်လို့ ဆိုပါတယ်။
~ ~ ~
ရွှေဖီမြေ သတင်းတွေကို Facebook နဲ့ Website အပြင် အောက်ဖော်ပြပါ ချန်နယ်တွေမှာလည်း ဝင်ရောက် ဖတ်ရှုနားဆင်နိုင်ပါတယ်။
