မိုင်းရူပ၊ မိုင်းအနိုင်
သတင်းဓာတ်ပုံ
စစ်ကောင်စီတပ်က ဗုံးကြဲတိုက်ခိုက်မှုကြောင့် ကိုရင်လေးတွေ အပါအဝင် သေဆုံးသူနဲ့ ဒဏ်ရာရသူ ၃၀ နီးပါးရှိခဲ့တဲ့ နောင်ချိုမြို့ပေါ်ရှိ စိန်ရတနာပရိယတ္တိစာသင်တိုက်ရဲ့ မြင်ကွင်းတွေ ဖြစ်ပါတယ်။
ဒီနေ့ မတ်လ ၁၈ ရက်အထိ ရွှေဖီမြေက ရရှိထားတဲ့စာရင်းအရ ကိုရင် ၅ ပါး၊ ဦးဇင်း ၂ ပါး၊ အမျိုးသား ၁ ဦး၊ အမျိုးသမီး ၂ ဦးတို့ သေဆုံးပြီး ဒဏ်ရာရသူတွေထဲမှာ ကိုရင် ၁၄ ပါး၊ အမျိုးသား ၁ ဦးနဲ့ အမျိုသား ၃ ဦးတို့ဖြစ်ပြီး စုစုပေါင်းသေဆုံးသူ ၁၀ ဦးနဲ့ ဒဏ်ရာရသူ ၁၈ ဦး ရှိခဲ့ပါတယ်။
ဒဏ်ရာပြင်းထန်သူတွေထဲမှာ သေဆုံးတာတွေ ရှိနေတာကြောင့် သေဆုံးသူအရေအတွက် ထပ်တိုးနိုင်ပါတယ်။
ပြီးခဲ့တဲ့ မတ်လ ၁၆ ရက် ညနေပိုင်းမှာ TNLA ထိန်းချုပ်ထားတဲ့ နောင်ချိုမြို့ပေါ်ရှိ စိန်ရတနာပရိယတ္တိစာသင်တိုက်ကို စစ်ကောင်စီက ဂျက်လေယာဥ်နဲ့ ဗုံး ၃ လုံးကြဲချတိုက်ခိုက်ခဲ့တဲ့အပြင် စက်သေနတ်တွေနဲ့ပါ ပစ်ခတ်ခဲ့ပါတယ်။
စိန်ရတနာပရိယတ္တိစာသင်တိုက်ထဲမှာ ဘုရားစာ သင်ကြားနေတဲ့ ကိုရင် ၆၀ ကျော်နဲ့ စစ်ရှောင် သက်ကြီးရွယ်အို ၂၀ နီးပါး နေထိုင်ကြတာ ဖြစ်ပါတယ်။
နောင်ချိုမြို့ကို TNLA ထိန်းချုပ်ပြီးနောက် စစ်ကောင်စီတပ်ဟာ လေကြောင်းတိုက်ခိုက်မှု ၁၀ ကြိမ် ထက်မနည်း ပြုလုပ်ပြီး အရပ်သားထိခိုက်သေဆုံးမှု ၁၀၀ ကျော် ရှိနိုင်တယ်လို့ ဒေသခံတွေက ပြောပါတယ်။
