မိုင်းရူပ၊ ယာရူစိင်၊ ဇွန်လ ၂၅ ရက်၊ ကျောက်မဲ
သတင်းဓာတ်ပုံ
တအာင်းတပ်မတော်-PSLF/TNLA ထိန်းချုပ်ထားတဲ့ ကျောက်မဲမြို့ပေါ်ကို စစ်ကောင်စီရဲ့ ဗုံးကြဲတိုက်ခိုက်မှုကြောင့် သေဆုံးသူ ၄ ဦးရဲ့ နာရေးကျင်းပနေတဲ့ မြင်ကွင်းတွေ ဖြစ်ပါတယ်။
သေဆုံးသူ ၄ ဦးကို လူမှုကူညီရေးအသင်းတွေက ဒီနေ့ ဇွန်လ ၂၅ ရက်နေ့လည်ပိုင်းမှာ မီးသဂြိုလ်ပေးခဲ့ပြီး သေဆုံးသူတွေထဲက ၂ ဦးဟာ ခန္ဓာကိုယ် အပိုင်းအစကို လိုက်ရှာဖွေကောက်ယူခဲ့ရတယ်လို့ လူမှုကူညီရေးအသင်းတွေက ရွှေဖီမြေကို ပြောပါတယ်။
မနေ့ ဇွန်လ ၂၄ ရက် ညနေ ၅ နာရီဝန်းကျင်မှာ တိုက်ပွဲဖြစ်ပွားတာမရှိဘဲ လူနေထူထပ်တဲ့ ကျောက်မဲမြို့ပေါ် ရပ်ကွက်-၇ နဲ့ ရပ်ကွက်- ၃ ကို စစ်ကောင်စီတပ်က ဂျက်လေယာဥ်နဲ့ ဗုံး ၂ ကြိမ်ကြဲတိုက်ခိုက်ခဲ့ပါတယ်။
စစ်ကောင်စီရဲ့ ဗုံးကြဲတိုက်ခိုက်မှုကြောင့် စံပြထမင်းဆိုင်က သားအမိအပါအဝင် ရှမ်းမြောက် နောင်ချိုမြို့ဘက်ကနေ စစ်ရှောင်လာတဲ့ အမျိုးသမီး ၂ ဦးလည်း သေဆုံးခဲ့ပါတယ်။
ဒါ့အပြင် စစ်ကောင်စီရဲ့ ဗုံးကြဲတိုက်ခိုက်မှုကြောင့် ကလေးငယ်အပါအဝင် ဒဏ်ရာရသူ ၁၄ ဦးထက်မနည်းရှိခဲ့ပြီး ဆေးကုသမှုခံယူနေရပါတယ်။
စစ်ကောင်စီတပ်ဘက်ကတော့ ကျောက်မဲမြို့ပေါ်က လေကြောင်းတိုက်ခိုက်မှုနဲ့ ပတ်သက်ပြီး တစုံတရာ တုန့်ပြန်ထားတာ မရှိသေးပါဘူး။
ရွှေဖီမြေ သတင်းတွေကို Facebook နဲ့ Website အပြင် အောက်ဖော်ပြပါ ချန်နယ်တွေမှာလည်း ဝင်ရောက် ဖတ်ရှုနားဆင်နိုင်ပါတယ်။
