ဝတ်မှုံ၊ မတ်လ ၁၀ ရက်၊ မူဆယ်
စစ်ကောင်စီတပ် ထိန်းချုပ်ထားတဲ့ တရုတ်-မြန်မာနယ်စပ် မူဆယ်မြို့ ကောင်းမူလွယ်ရပ်ကွက်ရှိ စူပါမားကတ်ဆိုင်ရှင် အမျိုးသမီးတစ်ဦးကို ပြန်ပေးဆွဲသွားတဲ့ အမျိုးသား ၃ ဦးကို ဖမ်းမိခဲ့တယ်လို့ ဒေသခံတွေဆီက သိရပါတယ်။
ပြီးခဲ့တဲ့ မတ်လ ၈ ရက် ညနေ ၅ နာရီဝန်းကျင်မှာ လက်နက်ကိုင်ဆောင်ထားတဲ့ အမျိုးသား ၃ ဦးက ကောင်းမူလွယ်ရပ်ကွက် ဖူလီလိုက်လမ်းကြားရှိ စူပါမားကတ်ဆိုင်ပိုင်ရှင် အမျိုးသမီးကို ဆိုင်ထဲအထိ ဝင်ရောက်ပြီး ပြန်ပေးဆွဲခဲ့တာပဲ ဖြစ်ပါတယ်။
“မူဆယ်မှာက အဲလိုတွေကြီးပဲဆိုတော့ ဘယ်အဖွဲ့မှန်းကို မသိဘူး။ တချို့လည်း ပြည်သူ့စစ်နာမည်တွေသုံးပြီး ပြန်ဖမ်းမိရင်တော့ ပြည်သူ့စစ် မဟုတ်ဘူး ဖြစ်ပြန်ရော။ ဓားပြတိုက်တဲ့အဖွဲ့တွေက အဲလိုတွေကြီးပဲ” လို့ ဖြစ်စဉ်သိရှိသူ အမျိုးသားတစ်ဦးက ပြောပါတယ်။
မနေ့ မတ်လ ၉ ရက် နေ့လယ် ၂ နာရီဝန်းကျင်မှာ ပြန်ပေးဆွဲသွားတဲ့ အမျိုးသား ၃ ဦးကို မင်္ဂလာမူဆယ်ဘက်သွားတဲ့ လမ်းဘက်က အဆောက်အဦးတစ်ခုထဲ စစ်တပ်၊ ရဲနဲ့ စစ်ဘက်ရေးရာ လုံခြုံရေးတပ်ဖွဲ့ ပူးပေါင်းပြီး ဖမ်းဆီးခဲ့တယ်လို့ အထက်ပါ အမျိုးသားက ဆက်ပြောပါတယ်။
မူဆယ်မြို့ဟာ စစ်တပ်နဲ့ ၎င်းရဲ့ လက်အောက်ခံ ပြည်သူ့စစ်အဖွဲ့ပေါင်းစုံ သွားလာလှုပ်ရှားတဲ့နယ်မြေဖြစ်ပြီး ခိုးမှု၊ လုယက်မှု၊ ဓားပြတိုက်မှုနဲ့ ပြန်ပေးဆွဲတာတွေ မကြာခဏ ဖြစ်ပွားနေပါတယ်။
ပြီးခဲ့တဲ့ ဇန်နဝါရီလကလည်း မူဆယ်မြို့မှာ မင်္ဂလာဆောင် ဖျော်ဖြေဖို့အတွက်ဆိုပြီး အဆိုတော် ရှင်မင်းမြတ်နဲ့ ၎င်းရဲ့သူငယ်ချင်းဖြစ်သူကို လိမ်လည်ဖိတ်ခေါ်ခဲ့ပြီး ပြန်ပေးဆွဲကာ သိန်း ၃ ထောင်ကျော် ပြန်ပေးခဲ့ရတယ်လို့ အဆိုတော် ရှင်မင်းမြတ်က သူ့ရဲ့ လူမှုကွန်ရက်စာမျက်နှာမှာ ဖော်ပြထားပါတယ်။
~ ~ ~
ရွှေဖီမြေ သတင်းတွေကို Facebook နဲ့ Website အပြင် အောက်ဖော်ပြပါ ချန်နယ်တွေမှာလည်း ဝင်ရောက် ဖတ်ရှုနားဆင်နိုင်ပါတယ်။
