သုတ၊ ဖေဖော်ဝါရီ ၂၀ ရက်၊ သိန္နီ
ကိုးကန့်တပ်မတော်-MNDAA ထိန်းချုပ်ထားတဲ့ ရှမ်းမြောက် သိန္နီမြို့မှာ တအာင်းလူမျိုးတွေကို MNDAA က ဖြတ်သန်းသွားလာခွင့် ပိတ်ပင်ထားတယ်လို့ ကိုယ်တိုင်ကြုံတွေ့ခဲ့ရသူတစ်ဦးက ရွှေဖီမြေကို ပြောပါတယ်။
“ကွတ်ခိုင်ကနေ သိန္နီဘက် ဆင်းမလို့ တိုးဂိတ်မှာ MNDAA က ဂိတ်အသစ်ဖွင့်ပြီးတော့ ကားရော၊ ဆိုင်ကယ်ရော စစ်နေတာ။ တအာင်းဆိုရင် ပေးမဝင်တော့ဘူး၊ ပြန်လှည့်ခိုင်းတယ်။ ကျွန်တော်တောင်မှ ကွတ်ခိုင်ဘက် ပြန်လှည့်ရတယ်” လို့ ဒီနေ့ ဖေဖော်ဝါရီ ၂၀ ရက်နေ့လည်ပိုင်းမှာ ကြုံခဲ့ရတဲ့ တအာင်းလူမျိုး အမျိုးသားတစ်ဦးက ရွှေဖီမြေကို ပြောပါတယ်။
ပြီးခဲ့တဲ့ ဖေဖော်ဝါရီ ၁၄ ရက်မှာ ရှမ်းမြောက် ကွတ်ခိုင်မြို့မှာ တအာင်းတပ်မတော်-TNLA နဲ့ ကိုးကန့်တပ်အကြား တင်းမာမှု ဖြစ်ပြီး သိန္နီမြို့အဝင်အထွက်တွေကို ကိုးကန့်တပ်ဘက်က စစ်ဆေးမှု တင်းကြပ်လာပြီး တအာင်းလူမျိုးတွေကို အဓိကထား စစ်တေးတင်းကြပ်နေတာ ဖြစ်ပါတယ်။
ပြီးခဲ့တဲ့ ရက်ပိုင်းအတွင်း TNLA တပ်ဖွဲ့ဝင်တွေကိုသာ သိန္နီမြို့ထဲမှာ ကိုးကန့်တပ်က ဖြတ်သန်းသွားလာခွင့် ကန့်သတ်ထားပေမယ့် လက်ရှိမှာ တအာင်းလူမျိုးတွေကိုပါ ဖြတ်သန်းသွားလာခွင့် ကန့်သတ်လာတာ ဖြစ်ပါတယ်။
ဒီနေ့ ဖေဖော်ဝါရီ ၂၀ ရက်အထိ ကွတ်ခိုင်မြို့နယ်ထဲမှာ MNDAA နဲ့ TNLA အကြား စစ်ရေးတင်းမာမှုတွေ ဆက်ဖြစ်နေတယ်လို့ ဒေသခံတွေက ဆိုပါတယ်။
~ ~ ~
ရွှေဖီမြေ သတင်းတွေကို Facebook နဲ့ Website အပြင် အောက်ဖော်ပြပါ ချန်နယ်တွေမှာလည်း ဝင်ရောက် ဖတ်ရှုနားဆင်နိုင်ပါတယ်။
