သုတ၊ ဖေဖော်ဝါရီ ၁၆ ရက်၊ သိန္နီ
ရှမ်းမြောက် သိန္နီမြို့အဝင်အထွက်ကို ကိုးကန့်တပ်မတော်-MNDAA က စစ်ဆေးမှုတွေ တင်းကြပ်နေပြီး ဖြတ်သန်းသွားလာခွင့်ရဖို့ ကားတွေ နာရီနဲ့ချီ စောင့်ဆိုင်းနေရတယ်လို့ ကားသမားတွေက ရွှေဖီမြေကို ပြောပါတယ်။
ပြီးခဲ့တဲ့ ဖေဖော်ဝါရီ ၁၄ ရက်မှာ ရှမ်းမြောက် ကွတ်ခိုင်မြို့မှာ တအာင်းတပ်မတော်-TNLA နဲ့ ကိုးကန့်တပ်အကြား တင်းမာမှုဖြစ်ပြီး သိန္နီမြို့အဝင်အထွက်တွေကို ကိုးကန့်တပ်ဘက်က စစ်ဆေးမှု တင်းကြပ်လာတာ ဖြစ်ပါတယ်။
“ပလောင်ဆိုရင် အဓိက စစ်တယ်။ စစ်သား ဟုတ်မဟုတ် မေးတယ်။ ရေပူဂိတ်နဲ့ သိန္နီမြို့အဝင် တိုးဂိတ်မှာ စစ်တာ။ ကားတွေ အများကြီးပဲ တန်းစီရတာ။ ၃ နာရီလောက် ကြာတယ်” လို့ ကားသမားတစ်ဦးက ရွှေဖီမြေကို ပြောပါတယ်။
ကိုးကန့်တပ်ဘက်က မြို့အဝင်အထွက်ကို စစ်ဆေးမှု တင်းကြပ်ပေမယ့် ဖြတ်သန်းသွားလာတဲ့သူတွေကို ဖမ်းဆီးထားတာ မရှိဘူးလို့ သိရပါတယ်။
ပြီးခဲ့တဲ့ ဖေဖော်ဝါရီ ၁၃ ရက် ညနေပိုင်းမှာ တအာင်းတပ် ထိန်းချုပ်ထားတဲ့ ကွတ်ခိုင်မြို့ပေါ်မှာ MNDAA တပ်ဆင်ထားတဲ့ CCTV တွေကို လိုက်ဖြုတ်ရာကနေ နှစ်ဖက်တပ်တွေ ထိုးကြိတ်မှု ဖြစ်ပွားခဲ့တာ ဖြစ်ပါတယ်။
လက်ရှိမှာ ကွတ်ခိုင်မြို့ပေါ် MNDAA တပ်ဖွဲ့ဝင် မရှိတော့ဘဲ နှစ်ဖက်တပ်အကြား စစ်ရေးတင်းမာမှု မရှိတော့ဘဲ မြို့ပေါ်မှာ လူထုတွေ ပုံမှန် သွားလာနေတယ်လို့ ကွတ်ခိုင်မြို့ခံတစ်ဦးက ရွှေဖီမြေကို ပြောပါတယ်။
~ ~ ~
ရွှေဖီမြေ သတင်းတွေကို Facebook နဲ့ Website အပြင် အောက်ဖော်ပြပါ ချန်နယ်တွေမှာလည်း ဝင်ရောက် ဖတ်ရှုနားဆင်နိုင်ပါတယ်။
