လိုည်းဇူန်မိုး၊ ကျံရ်ဇံန်နႎရီ ဆငည်း 20၊ မူစယ်
ဘိူန်းအယ်နံပ် ဒီဘိူန်းတံပ်ကညာအာဏာဆီုင်ဇေဝ်ကဲတထိင်ခြဲ ပကပီုန်ဆျှံမ်ကဒါႇပိူည် ဒီကစာပ်ကုင်ခယ် ကာည်း ကုင်ကပိုမ်ဘြာန် ခေဲင်ကီုင်းမူစယ်နီန် ဆီုက်ရဝ်အူအီးနီန် ပဴင်ယံမ်းဟာဝ်းဖါ်ႈ အီပ်ုန်အ်ုန် ဒါဆနာတ် စီႎီရ်ပဴင်ယံမ်းဘိုးအ်ုန်အောႏ။
ကဝ်အီနံပ်ဘည်မိုႈဘည်ဘာည်း ကောန်အီမာည်း အူအီးက္လာင်းဒါႈ ခည်ကျံရ်ဇံန်နႎရီ ဆငည်း 17 ခီညှာ ကပံတ် 11 နြီဒိူန် ဆီုက်ရဝ်အူအီးနီန် ပဴင်ယံမ်းဟာဝ်းဖါ်ႈ အီပ်ုန်အ်ုန် ပဂါင်ကဲ ခေဲင်ဇံင်ကောင်းမှုတုံနီန် ဟောည်ႇဒီန် စီႎီရ်ပဴင်ယံမ်း ဟာဝ်းဘိုးအ်ုန်ဒါဆနာတ်အောႏ။
“ဆေအ်ုန်ဘာည်းစီ အာဝ်နံပ်။ နံင်မိုႈလိူည်အ်ုန်ဟည်ကွံင်ခံင်မဝ်း။ အ်ုန်ခံင်မိုႈ ဆီုက်ရဝ်ဒီႈ နံင်မိုႈအ်ုန်ညောတ် ယာမ၊ ခါခူးကဲနီန်။ ဘံန်ႎီရ်ဒေဲႈအ်ုန်တဂါင်း ဆေဂါရ်အီပ်ုန်အ်ုန်လည်ဒါႈစိအာဝ်နံပ်။ အာဝ်လှေင်စိ အ်ုန်ဟည်ပဴင်ယံမ်းအီပ်ုန်အ်ုန်။ ဟောည်ႇပဴင်ဖါ်ႈအီပ်ုန်အ်ုန် စီႎီရ်ပဴင်ယံမ်းဘိုးအ်ုန်။ ခိင်ဒီန် ကဲအီဂေါည်ကဒံပ်တောပ်ကဲစိယိူဝ်းဖါ်ႈ စီဟြာင်းက္လာင်းလာ် တဖုင်ဌာနအီကဆီုဝ်ကဆဲင်ကဲ”။
ကောန်အီမာည်း ကဝ်အီမိုႈဆီုက်ရဝ်ဒီန် ဂေါႇဆေစီပဲန်အ်ုန်ရေဲန်ဟာဝ်းဘာည်းနီန်စီ ဖုင်ယဲဆျှိုည်ဖီမျေ အာဝ်ဘယ်စိဒါႈကတီးအရီးအောႏ။
မိူဝ်ႈဘိုးကောန်အီမာည်း ကဝ်အီနံပ်ဘည်မိုႈဘည်ဘာည်းနီန် “ လှေဒီန်ညာအေ့။ အဆေဒေဲႈပဴင်စီ အာဝ်နံပ်။ ဖုင်မှောမာ်အာဝ်နံပ်။ မိုႈစီမိုႈအူန်းဆီုက်ရဝ်။ မိုႈလိူည်အာဝ်နံပ်စိ ဖုင်မှောအ်ုန်မိုႈ”။
အမှုလောင်ကပဴင် ပ်ုန်ပဲန်ဟာဝ်းလှေနီန် မိုႈလိူည်ပ်ုန်က္လာင်းတိုအီးအရာပ်ကဲ ညှံမ်နံပ်စိ လောင်ယံမ်းဟာဝ်းကဲ ကတီးကရီးအောႏ။
ဘာည်းလိူည်ဒီန် ခည်ကျံရ်နိုႎဲမ် ဆငည်း 7 ခည်ဆန်ုမ် 2025 ဒိူန်မာ် ခေဲင်ကီုင်းမူစယ်နီန် ဆီုက်ရဝ်အူအီး ဂေါႇမိုႈဟည်တျံင်မဝ်း အိုမ်ဆနံမ်နီန် ပဴင်ယံမ်းဟာဝ်းဖါ်ႈ ဆီုက်ရဝ်အီဂေါည်ခြူမ်တည်အ်ုန် အာရ်အီးအောႏ။
ဘိူန်းအယ်နံပ် ခည်ဆန်ုမ် 2025 ခေဲင်ကျံရ်ဇံန်နႎရီ ဆငည်း 19 ဒိူန်မာ် ခေဲင်ကီုင်းမူစယ်နီန် ဆီုက်ရဝ်မန်ပြိန်းကဲခနားကဲ ဒါဂီုန်းဖါ်ႈလာ်ဒါခံင်းမဝ်းနီန် ပဲန်ဟာဝ်းဖါ်ႈ အမှုလည်ကပဴင်နီန် ဆီုက်ရဝ်အူအီးယံမ်းဟာဝ်းအောႏ။
ခေဲင်လှံင်မူစယ်နီန် မိုႈဒီဟာဝ်းႎီရ်ကောန်ဆီုက်တံပ်ကညာအာဏာဆီုက်ဇေဝ် ကာည်း ဆီုက်ရဝ်ကဲနီန် ဆဲႈဒီန် မိုႈဘိုး ခနားကဲမာ် ဂေါည်ဂေါည်ပဲန်အမှုလည်ကပဴင်နီန် အမှုဘြား၊ အမှုကဖါ်ႇ၊ အမှုစိုန် ကာည်း အမှုရံပ်တိုည်းလာည်းရိူန်းအောႏ။
ဆီုက်ရဝ်ကဲဒီန် မိုႈဒိုႇအီမိူဝ်ႈအူန်း ယုင်ကျားဖြန်၊ ပါင်ကတော်၊ ယုင်ခံင်မဝ်း ကာည်း ယုင်ဒီယံင်းတိုပိုင်းကာမ ဟောည်ႇဒီန် ထာမ်းဖါ်ႈလာ်ဒါရူရ်ႈစီႎိူဝ်ဟာဝ်းအောႏ။
ကဝ်အီကပ္လါႇဘေဲႇဆဒါင် – လိုည်းပိုႈဆပေ
~ ~ ~
ဆဒါင်ဖုင်ယဲဆျှိုည်ဖီမျေနီန် အာဝ်ႎံန်း ခေဲင် Facebook ကာည်း Website ဘိူန်းဘိုးဒီရ်ႈ၊ ဆဒံင်တငါဝ်း ခေဲင် ချှံန်နယ် ပ်ုန်ကိက်ပ္လေႈ ရခြူမ်ကဲနီန်အောႏ။
