လွေးလာဝ်ဇာရ်၊ မတ်လ၊ ၉ ရက်
တအာင်းတပ်မတော်(PSLF/TNLA) ထိန်းချုပ်ထားတဲ့ ကျောက်မဲမြို့နယ် တောင်နောက်ကျေးရွာမှာ လက်ပစ်ဗုံးပေါက်ကွဲရာကနေ ဒေသခံ ၂ ဦးသေဆုံးပြီး ၃ ဦးဒဏ်ရာရခဲ့တယ်လို့ ရွှေဖီမြေက စုံစမ်းသိရှိရပါတယ်။
ဖြစ်စဉ်က ပြီးခဲ့တဲ့ မတ်လ ၇ ရက် နေ့လယ် ၂ နာရီခွဲမှာဖြစ်ပွားခဲ့ပြီး အမျိုးသားတစ်ဦးဟာ ဘယ်ကနေ ယူလာမှန်းမသိတဲ့ လက်ပစ်ဗုံးတစ်လုံးကို ဆွဲမိခဲ့တာကြောင့် ပေါက်ကွဲမှုဖြစ်တာလို့ ဆိုပါတယ်။
ကျောက်မဲမြို့မှ တအာင်းတပ်ရဲ့ တာဝန်ရှိသူတစ်ဦးက “အကုန်လုံးက ဒေသခံတွေဘဲ။ ခေါက်ဆွဲဆိုင်တစ်ဆိုင်မှာ သူတို့ ခေါက်ဆွဲစားနေတာ။ အမျိုးသားတစ်ယောက်က သူ့လွယ်အိတ်ထဲမှာ လက်ပစ်ဗုံးပါလာတယ်။ သူဆွဲမိလို့ ထင်တယ်။ အဲဒါနဲ့ ပေါက်ကွဲတာ။ သူလည်း သေ၊ သူ့အနားမှာ ဘီယာထိုင်သောက်တဲ့သူလည်း သေ။ ဆိုင်ရှင်အပါ သုံးယောက်က ဒဏ်ရာရတယ်” လို့ ပြောပါတယ်။
လက်ပစ်ဗုံးယူလာတဲ့ အားရှင်းနဲ့ ဦးကျော်ဌေးဆိုသူဟာ သေဆုံးခဲ့ပြီး ဆိုင်ပိုင်ရှင်ဖြစ်သူ ဒေါ်ဆိုင်ဟိန်း အပါ စိုင်းဘထွန်းနဲ့ ဆန်းဦးက ဒဏ်ရာရခဲ့တာ ဖြစ်ပါတယ်။
ပြီးခဲ့တဲ့ ဖေဖော်ဝါရီ ၂၁ ရက်မှာလည်း သီပေါမြို့အနီးရှိ ကုံးစုံကျေးရွာမှာ နေအိမ်အတွင်း ပေါက်ကွဲမှုဖြစ်လို့ ဒေသခံ ၂ ဦးသေဆုံးပြီး ၁ ဦးဒဏ်ရာရခဲ့တဲ့အပြင် ဖေဖော်ဝါရီ ၂၅ ရက် တုံစင့်ရပ်ကွက် နယ်မြေ ၂ မှာ စစ်တပ်ရဲ့ လက်ဗစ်ဗုံးကို ဆော့ကစားရာကနေ ဗုံးပေါက်ကွဲပြီး အမျိုးသား ၂ ဦး သေဆုံးခဲ့ဖူးပါတယ်။
ကျောက်မဲမြို့ကို ၁၀၂၇ စစ်ဆင်ရေး ဒုတိယလှိုင်းအတွင်း ၂၀၂၄ ဩဂုတ် ၅ ရက်မှာ တအာင်းတပ်က တိုက်ခိုက်သိမ်းပိုက်ပြီးတော့ လက်ရှိမှာ အုပ်ချုပ်ရေးယန္တရား လည်ပတ်နေတဲ့မြို့ ဖြစ်ပါတယ်။
