ခိုင်လေး၊ မတ်လ ၉ ရက်၊ ကြို့ပင်ကောက်
ပဲခူးတိုင်း၊ သာယာဝတီခရိုင်၊ ကြို့ပင်ကောက်မြို့နယ်၊ ရုံးချောင်းရွာ လယ်ကွင်းထဲ တပ်ဖြန့်ပြီး စစ်ကြောင်းထိုးလာတဲ့ စစ်ကောင်စီ စစ်ကြောင်းကို သာယာဝတီခရိုင် တပ်ရင်း (၃၈၀၂)၊ တပ်ခွဲ(၆) က မိုင်းဆွဲတိုက်ခိုက်ခဲ့တာကြောင့် စစ်သား ၃ ဦး သေဆုံးပြီး ၇ ဦး ဒဏ်ရာရခဲ့တယ်လို့ သာယာဝတီခရိုင် တပ်ရင်း (၃၈၀၂)မှ တာဝန်ရှိသူ တစ်ဦးက ရွှေဖီမြေကိုပြောပါတယ်။
မနေ့ မတ်လ ၈ ရက်နေ့က အင်အား(၅၀)ခန့်ပါ စစ်ကောင်စီ စစ်ကြောင်းကို မနက် ၅နာရီခန့်က ဥယျာဥ်ကြီး-ရုံးချောင်း ဆက်သွယ်ရေး လမ်းပေါ်မှာ သာယာဝတီခရိုင် တပ်ရင်း ၃၈၀၂၊ တပ်ခွဲ၆ Black Dragon GBK-PDF ရဲဘော်များက စောင့်ကြိုမိုင်းဆွဲတိုက်ခိုက်ခဲ့တာဖြစ်တယ်လို့ ဆိုပါတယ်။
“အဲ့စကစတွေ ရုံးချောင်းနဲ့ဥယျာဥ်ကြီး ဆက်သွယ်ရေးလမ်းပေါ်ကိုတက်ရော မိုင်းဆွဲလိုက်တာ ၃ ကောင် နေရာတင်သေတယ်။ ၇ ကောင်ကလည်း ဒဏ်ရာတွေရလို့ အော်ဟစ်နေတာဗျ။ စစ်ရေးက နှစ်ဖက်တင်းမာနေဆဲ။ ရုံးချောင်းရွာက ပြည်သူ၂ယောက်ကို ဖမ်းသွားတယ်”
အဆိုပါ မိုင်းဆွဲတိုက်ခိုက်မှုအတွင်း သေဆုံးသူနဲ့ ဒဏ်ရာရတဲ့ စစ်ကောင်စီတပ်သားတွေကို သယ်ကာ ရုံးချောင်းရွာဘက်သို့ တပ်ဆုတ်သွားပြီး ရုံးချောင်းရွာက ဒေသခံတချို့ကို လူသားဒိုင်းအနေနဲ့ ဖမ်းဆီးခေါ်ဆောင်သွားတာရှိတယ်လို့ ဆိုပါတယ်။
လက်ရှိမှာ စစ်ကောင်စီတပ်သားတွေက ဒေသခံတွေကို လူသားဒိုင်းအနေနဲ့ ဖမ်းဆီးတာတွေ လုပ်ဆောင်နေတာကြောင့် ဒေသခံတွေအနေနဲ့ စစ်တပ်အနီး သွားလာနေထိုင်မှု မပြုလုပ်ကြဖို့နဲ့ တော်လှန်ရေးပူးပေါင်းတပ်ဖွဲ့မှ လည်း စစ်ကောင်စီတပ်တွေကို ပြင်းပြင်းထန်ထန် တိုက်ခိုက်သွားမှာ ဖြစ်တယ်လို့ အသိပေးထားပါတယ်။
