ယာရူစိင်၊ ကျံရ်ဇူန်လည် ဆငည်း 2၊ ဆဘော
ကောန်အီပ်ုန် ကဝ်အီဂေါည်ပဆဘောဒီန်အူအီး က္လာင်းတဆျှိုည်ဖီမျေဒါႈ တံပ်ကညာအာဏာဆီုက်ဇေဝ်ကဲ တိုည်းဖါ်ႈကဲအီငါ်ႈအရာင် ပဒီကခါမ်အိုမ် ကီုင်းဆဘော ကပီုန်ဆျှံမ်ကဒါႇပိူည် အ်ုန်အီမိုႈဒီပ်ုန်ထိင်ခြဲအူန်း တံပ်ကညာအာဏာဆီုက်ဇေဝ်ကဲနီန်အောႏ။
ဆီုင်ခည်ဆန်ုမ် 2025 ကျံရ်နိုႎဲမ်ဘာ ဆငည်း 14ဒိူန် ဂေါႇမိုႈကဲဘိအူန်း အခွါင်းဟာဝ်းႎီရ် ပကပုဆဘောနီန် အာဝ်မိူဝ်ႈထာန်ပ္လအူန်းဆငည်း စီပဲန်တိုအီးခေဲင်အရာပ်ကဲ ဘ်ုပ်ဟာဝ်းႎီရ်လိူည်တောပ် ကလေဲႇကခါမ်အိုမ်နီန်အောႏ။
“ဆာ်မိုႈဘည်တိုည်းကဲနီန် ကဲဇူႈလိူည်ဒေတိုည်းခေဲင်ဆန်ုမ်နီန်။ မံင်အီးမာ် ဂီုည်ငါ်ႈဟြာင်းဖါ်ႈ အရာင်ရည်း။ ဆာ်ကဲယိူဝ်းမာ် ကဲတိုည်းဘည်ယိူဝ်းကဲ။ ကဲဒါႈမိုႈ ယောကဲတိုန်းဆဒါင် တမီဒီယာ စီပဲန်ကဲတိုည်း”
တိုအီးခေဲင်အရာပ်ကဲ ဘိူည်က္လာင်းဒါႈ ဇူႈပွံတ်ကျံရ်ဇံန်နႎရီ ရောတ်ဘံင်ကျံရ်ဇူန်နီန် ကဲဟည်တိုည်းဟာဝ်း ကဲအီအာဝ်ဘိူန်းအခွါင်း ငါ်ႈဟာဝ်းအရာင်ကဲနီန် 6အီးမာ် ဂေါႇမိုႈ ကဆီုဝ်ဖုင်ယဲဆျှိုည်ဖီမျေ ညှံမ်ဘယ်လာ်ပ္လကတီးကရီး စီပဲန်ယဲဆီုပ်တခေါရ်အူန်းအောႏ။
မိူဝ်ႈဘိုးကောန်အီမာည်း ကဝ်အီဂေါည်ခေဲင်အရာပ်ဒီန်အူအီး က္လာင်းဒါႈ “ဆာ်မိုႈတေဲင်ကပု မိုႈလိူည်ကားတားဒါင်းကဲ အီဘိူန်းဒေခ္လေါႈ။ ဆဲႈဒါႇဒီန် အဆေမာ်အာဝ်ဘိူန်း။ မာင်တစာ်န်း ကဲဒဲႈအူန်းကားဒါင်းကဲခ္လေါႈ”
ငေါႈကခါမ်အိုမ်ဒီန် ကဲကဲပ်ဖါ်ႈ တိုအီးအူအီး ရိူန်း 1မှီုန် ဆာ်မိုႈကား ကဲကဲပ်ပွံတ် ယိူဝ်ႇ 2မှီုန် ရောတ်ဘံင် 5မှီုန်အောႏ။
ယိူဝ်ႇတမိုႈ တံပ်ကိုးကာင်းကဲကာည်း တံပ်ကညာအာဏာဆီုက်ဇေဝ်ကဲ လည်ဘိဖါ်ႈကပုဆဘောနီန် ဘံန်ရောတ်ကျံရ်ဇံန်နႎရီ ဆငည်း 2ဒိူန် တံပ်ကိုးကာင်းကဲ ဟည်က္လိုတ်ႎီရ် ဒါႇဂေက်ဒီန်ယာ့်အောႏ။
တိုအီးခေဲင်အရာပ်ကဲ မှာန်းအူန်း ကနာည်နှာင်းကဲအီရံပ်ဇီုင်းကပ္လိူင်ကဲနီန် ဇေဝ်းႎိူဝ်ႈဒဲႈကပုနီန် ကနာည်နံင်ဟာဝ်းႎီရ်ငှိူည် ကဆီုဝ်အီလေႈဒေင်၊ ကညာကားကဲကာည်း တိုအီးခေဲင်အရာပ်ကဲအောႏ။
ကဝ်အီကပ္လါႇဘေဲႇဆဒါင် – Lway N Tra
~ ~ ~
ဆဒါင်ဖုင်ယဲဆျှိည်ဖီမျေနီန် အာဝ်ႎံန်း ခေဲင် Facebook ကာည်း Website ဘိူန်းဘိုးဒီရ်ႈ၊ ဆဒံင်တငါဝ်း ခေဲင် ချှံန်နယ် ပ်ုန်ကိက်ပ္လေႈ ရခြူမ်ကဲနီန်အောႏ။
