မြတ်နိုး၊ ဇွန်လ ၃၀ ရက်၊ ဖားကန့်
ကချင်ပြည်နယ် ဖားကန့်မြို့နယ် ဆိပ်မူကျေးရွာအုပ်စု ဖားပြင်ရွာမှာ ကချင်တပ်မတော်- KIA ရဲ့ အရာရှိတစ်ဦး မနေ့ ဇွန်လ ၂၉ ရက် မနက်အစောပိုင်းမှာ သတ်ဖြတ်ခံရကြောင်း ဒေသခံတွေဆီက စုံစမ်းသိရှိရပါတယ်။
“လောလောဆယ်တော့ ဘာကြောင့်လဲဆိုတာ အတိအကျတော့ ပြောဖို့ခက်တယ်။ အဓိက တရားခံဖြစ်တဲ့ မုန်ဂျတ်အောင်က လောင်းကစား တော်တော် ဆော့တယ်လို့ သိရတယ်။ သူရောက်တာလည်း သိပ်မကြာသေးဘူး။ ရက်ပိုင်းလောက်ပဲ ရှိသေးတယ်” လို့ ဒေသခံအမျိုးသားတစ်ဦးက ရွှေဖီမြေကို ပြောပါတယ်။
လူသတ်မှု ကျူးလွန်သူက အရာရှိကို သတ်ဖြတ်ပြီး ကျပ်သိန်း ၅၀၀ နဲ့ ကားတစ်စီးပါ ယူဆောင်ပြီး မင်းဇေသန့် ဦးဆောင်တဲ့ ဝါရာဇွပ်ပြည်သူ့စစ်တပ်ဖွဲ့ဆီ ထွက်ပြေးသွားတယ်လို့ ဆိုပါတယ်။
“လောင်းကစားလုပ်တာ ရှုံးလို့တဲ့။ သိန်းတစ်ရာကျော် ရှုံးသွားလို့ ပိုက်ဆံ လာတောင်းတာ စကားများကြတယ်လို့ ကြားတယ်။ အိပ်နေတဲ့အချိန်မှာ လာခုတ်သတ်သွားတာလို့ သိရတယ်။ ခုတ်သတ်ပြီး အလောင်းကို ရေအိုင်ထဲမှာ ပစ်ချသွားတာ” လို့ ဒေသခံအမျိုးသမီးတစ်ဦးက ပြောပါတယ်။
လူသတ်မှု ကျူးလွန်သူက ဆိပ်မူကနေ မမုံဘက် ပြန်သွားပြီး မနက်အစောပိုင်းမှာ သတ်ဖြတ်ခံရသူ အိပ်နေချိန် ခုတ်သတ်ခဲ့တာဖြစ်ပြီး ဖားပြင်သင်္ချိုင်းအောက်ဘက်က ရေအိုင်မှာ သွားပစ်တာပဲ ဖြစ်ပါတယ်။
လက်ရှိမှာ သံသယရှိသူ ၂ ဦးကို ဖမ်းဆီးထားနိုင်ပြီး အဓိက ကျူးလွန်သူလို့ ယူဆရတဲ့ မုန်ဂျတ်အောင်ကတော့ ထွက်ပြေးလွတ်မြောက်နေဆဲဖြစ်တယ်လို့ ဒေသခံတွေက ပြောပါတယ်။
လက်ရှိအချိန်ထိ သတ်ဖြတ်မှု အကြောင်းအရင်းကို တာဝန်ရှိသူတွေက တရားဝင် ထုတ်ပြန်ထားတာ မရှိသေးပါဘူး။
ဖြစ်စဉ်နဲ့ပတ်သက်ပြီး သက်ဆိုင်ရာတာဝန်ရှိသူတွေက ဆက်လက်စုံစမ်းစစ်ဆေးနေပြီး ထွက်ပြေးနေတဲ့ သံသယရှိသူကို ဖမ်းဆီးရမိရေး ဆောင်ရွက်နေတယ်လို့ သိရပါတယ်။
~ ~ ~
ရွှေဖီမြေ သတင်းတွေကို Facebook နဲ့ Website အပြင် အောက်ဖော်ပြပါ ချန်နယ်တွေမှာလည်း ဝင်ရောက် ဖတ်ရှုနားဆင်နိုင်ပါတယ်။
