ရွှေဖီမြေ၊ ဇွန်လ ၃၀ ရက်၊ နမ့်ဆန်
တအာင်းတပ်မတော် ထိန်းချုပ်တဲ့ နမ့်ဆန်မြို့ထဲ တအာင်းပြည် ပညာရေးကောင်စီ- TLEC က ဦးဆောင်ဖွင့်လှစ်တဲ့ ဆရာ့အတတ်ပညာ အခြေခံသင်တန်းဆင်းပွဲ အခမ်းအနားကို မနေ့ ဇွန်လ ၂၉ ရက်မှာ ကျင်းပခဲ့တယ်လို့ တအာင်းတပ်က ထုတ်ပြန်ထားပါတယ်။
အဲဒီအခမ်းအနားကို ပါမောက္ခ ဒေါက်တာဟောည်,၊ နမ့်ဆန်မြို့နယ် ပညာရေးမှူး ဦးမောင်မောင်လေး၊ TLEC အတွင်းရေးမှူး၊ တွဲဖက်ဒါရိုက်တာတွေ၊ ဌာနဆိုင်ရာတာဝန်ရှိသူတွေ၊ ဆရာဆရာမနဲ့ သင်တန်းသူသင်တန်းသားအပါအဝင် လူဦးရေ ၂၀၀ နီးပါး တက်ရောက်ခဲ့ကြတယ်လို့ ဆိုပါတယ်။
သင်တန်းကို ပြီးခဲ့တဲ့ ဧပြီ ၂၈ ရက်ကနေ ဇွန်လ ၂၈ ရက်အထိ ၂ လကြာ ဖွင့်လှစ်ခဲ့ပြီး ဆရာတစ်ဦးအနေနဲ့ တာဝန်ထမ်းဆောင်ရာမှာ လိုအပ်တဲ့ အခြေခံ ဆရာ့အတတ်ပညာကို စနစ်တကျ သင်ကြားပို့ချပေးခဲ့တယ်လို့ ထုတ်ပြန်ချက်မှာ ဖော်ပြထားပါတယ်။
သင်တန်းကို သင်တန်းသူ ၁၀၃ ဦးနဲ့ သင်တန်းသား ၄၆ ဦး စုစုပေါင်း ၁၄၉ ဦး တက်ရောက်အောင်မြင်ခဲ့ကြပါတယ်။
သင်တန်းအတွင်း Education Theory၊ Educational Psychology၊ Myanmar၊ English၊ Mathematics၊ Science၊ Social Studies၊ Physical Education၊ Performing Arts (Music)၊ Visual Arts၊ Local Curriculum (Agriculture, DS, IS)နဲ့ Practice Teaching (Practicum) အပါအဝင် အဓိကဘာသာရပ် ၁၂ ခုကို သင်ကြားပို့ချပေးခဲ့တယ်လို့ ဖော်ပြထားပါတယ်။
ဒါ့အပြင် သင်တန်းကာလအတွင်း နည်းပြဆရာဆရာမနဲ့ သင်တန်းသူသင်တန်းသားတွေ စာပေထူးချွန်ဆု၊ သရုပ်ပြသင်ကြားမှု အကောင်းဆုံးဆု (မြန်မာ၊ အင်္ဂလိပ်၊ သင်္ချာ၊ လူမှုရေး၊ သိပ္ပံ)၊ ပန်းချီအနုပညာ အကောင်းဆုံးဆု၊ သင်ထောက်ကူဖန်တီးမှု အကောင်းဆုံးဆု၊ ကြက်တောင်အားကစား အကောင်းဆုံးဆု၊ ခြင်းလုံးအားကစား အကောင်းဆုံးဆုနဲ့ အတန်းလိုက် ကာယသရုပ်ပြမှု အကောင်းဆုံးဆုတွေကို ချီးမြှင့်ပေးအပ်ခဲ့ပါတယ်။
TLEC အနေနဲ့ သင်တန်းကို ဆရာဆရာမတွေအတွက် မဖြစ်မနေ လိုအပ်တဲ့ အခြေခံ ဆရာ့အတတ်ပညာ တတ်မြောက်စေဖို့၊ ဆရာ့အတတ်ပညာသင်တန်း မတက်ရောက်ဖူးသူအနေနဲ့ သင်ယူခွင့် ရရှိစေဖို့၊ အရည်အသွေးပြည့်ဝတဲ့ ဆရာဆရာမတွေကို လေ့ကျင့်ပျိုးထောင်ပေးဖို့နဲ့ ဆရာ့အတတ်ပညာဆိုင်ရာ စဉ်ဆက်မပြတ် လေ့လာသင်ယူနိုင်မယ့် အခွင့်အလမ်းတွေ ဖန်တီးပေးဖို့ ရည်ရွယ်ပြီး ဖွင့်လှစ်ခဲ့ခြင်းဖြစ်တယ်လို့ ဆိုပါတယ်။
~ ~ ~
ရွှေဖီမြေ သတင်းတွေကို Facebook နဲ့ Website အပြင် အောက်ဖော်ပြပါ ချန်နယ်တွေမှာလည်း ဝင်ရောက် ဖတ်ရှုနားဆင်နိုင်ပါတယ်။
