ပိုႈလဘား၊ ကျံရ်ဇူန် ဆငည်း 28၊ ကော်င်တံပ်
အီလီပ်ဖုင် ကာ်မ်မတီလံပ်ႎီရ်ပျိူဝ်ႇယိူဝ်ႇနီန်အူအီး က္လာင်းတဆျှိုည်ဖီမျေဒါႈ ကဲကဇောည်ထာ့်ဒဲႈရိူန်းတ ဂါင်ကဲလူလှေဲဝ်ႏဟာဝ်းကဲဒိူန် ကနာည်လံပ်ႎီရ်ပျိူဝ်ႇယိူဝ်ႇ ရဝ်ကော်င်တံပ် ကီုင်းအေဲမ်ခြီရ် အ်ုန်အီမိုႈဒီပ်ုန်ထိင်ခြဲအူန်း တံပ်နာန်းတအာင်း – PSLF/TNLA နီန် ဒီဇာရ်အ်ုန် အူကြောင် 1ဟြဲင်ဆဲန်အောႏ။
ဆဲႈဒါႇရိူန်းပ်ုန်ကလှူ ဖုင်ဘားလာက်နာက် ကောန်တီုင်ကုင် ရိူန်းလှူကူန်ရဝ်မာဂါင်ကဲအီဂေါည် ခေဲင်ကုင်နှာရိူဝ်ႇကုင်ကဲနီန်ပါ်ဒိုႇဒိုည်ႇ ဇူႈပွံတ်ခည်ကျံရ်ဇူန် ဆငည်း 13ဒိူန် ဖုင်တံပ်နာန်းတအာင်းကဲကာည်း ဖုင်ကပါင်းကဒါႇကူန်ရဝ်မာဂါင် ဟည်တောပ်ဒေကဇောည်ဒဲႈ တဂါင်အီလူလှေဲဝ်ႏကဲနီန်အောႏ။
ကဲဒါႈ ကဲတိူရ်ႈဖါ်ႈလာ်ဒါ ခူရ်က္လာည်းတေဲင်ဘည်လူလှေဲဝ်ႏဟာဝ်း စီအာပ်ဒဲႈရိူန်းလှူ ပ်ုန်ဘိူန်းအူန်း ကနာည်ဂါင်ကဲအီလူလှေဲဝ်ႏဟာဝ်း ဂေါႇဂိုဒေါင်ယာမ်းပဒူႈဟာဝ်းနီန်အောႏ။
“ခည်ဇူႈအ်ုန် အာန်းနံင်ရေဲန်ဒဲႈကဲဂေါည် နှာင်းကနှေရ်။ မိုႈလိူည် မံင်ခ္လမာ် ဒါႈဒေ အုင်လိူည်ဂေါည်ဂါင်လမေဲႈ ခ္လမာ်အုင်လိူည်ဂေါည်ကထာပ်။ ဒဲႈဟာဝ်းလိူည်ရိူန်းတကဲ။ ဒဲႈလိူည် တေဲင်ဘည်မိုႈဂါင်ကဲဒီးကော်။ ခံင်မိုႈအ်ုန်မိူဝ်ႈ ဂါင်အာရ်ထာပ်၊ ဂါင်အိုည်ထာပ်၊ ဂါင်လမေဲႈကဲနီန် ဂေါႇဘည်ဒီန် အူအီးတအူအီး နံင်အာဝ်ကနှေရ်။ မံင်ခ္လမာ်မိုႈ တာရ်ပယာႈဆဲန်၊ ဖံန်ပယာႈဆဲန်ဒီးကော်။ ဆာ်မိုႈဂါင်ကဲ အီလူလှေဲဝ်ႏဟာဝ်း စရူစရီတ်ကဲဒိူန် 20ဆဲန်ဒီး။ မံင်ခ္လမာ် အာဝ်ရံပ်ခါမ်။ ကဲအီဒါႈရိူန်းဒဲႈကဲနီန်ဘြေ့ အီအာဝ်လာည်းမာ်မိူဝ်ႈ”
ဇူႈပွံတ်ကျံရ်ဇူန် ဆငည်း 1 ရောတ်ဘံင်ကျံရ်ဇူန် ဆငည်း 17ဒိူန် ကဲဘိူန်းဟာဝ်းရိူန်းလှူ ကနာည်လံပ်ႎီရ်ပျိူဝ်ႇယိူဝ်ႇ ရဝ်ကော်င်တံပ်နီန် 2မှီုန်လေႈ 2ဟြဲင်ဆဲန် ရိူန်းခယ် ယူန် 228000 (ရိူန်းဘြာန် ကပံတ် 1500 ဆဲန်) အောႏ။
ဆဲႈဒါႇဒီန် ကဒါႇတီုင်ဌာနလံပ်ဘြောင်ရိူန်းခြီရ် တံပ်နာန်းတအာင်းကဲမာ် ဒေဲႈကဇောည်ဟာဝ်းဘိုး ကနာည်ဂါင်လူလှေဲဝ်ႏဟာဝ်းကဲနီန် 4မှီုန်ဆဲန်အောႏ။
ဘည်ဒါ့်မိူဝ်ႈအူန်း အီးဒေဲႈကဇောည်ရိူန်း ကနာည်လံပ်ႎီရ်ပျိူဝ်ႇယိူဝ်ႇ ရဝ်ကော်င်တံပ်နီန် ဘည်ဒါ့်ကဲပ်ကဲတ ရိူန်းလှူကဲနီန်မာ် မိူဝ်ႈအေ့အောႏ။
ခည်ကျံရ်မေ ဆငည်း 31ဒိူန် ဂေါႇမိုႈဂိုဒေါင်ယာမ်း တံပ်နာန်းတအာင်းကဲ ပဒူႈဟာဝ်း စီပဲန်တိုအီးခေဲင်အရာပ်ကဲ ဟည်ယံမ်းဟာဝ်းဖါ်ႈ 41 ဘာတ် 154 အီး ဂါင်ဂေါည်မာ် ဟည်လူလှေဲဝ်ႏဟာဝ်းဖါ်ႈ 680ကြောင် ခေဲင်အီဒီန် ပ်ုန်ကဆူမ်းဟာဝ်းငံရ် ဂေါင် 40ကြောင်အောႏ။
ကဝ်အီကပ္လါႇဘေဲႇဆဒါင် – Lway N Tra
~ ~ ~
ဆဒါင်ဖုင်ယဲဆျှိည်ဖီမျေနီန် အာဝ်ႎံန်း ခေဲင် Facebook ကာည်း Website ဘိူန်းဘိုးဒီရ်ႈ၊ ဆဒံင်တငါဝ်း ခေဲင် ချှံန်နယ် ပ်ုန်ကိက်ပ္လေႈ ရခြူမ်ကဲနီန်အောႏ။
