ပိုႈလဘား၊ ကျံရ်ဇူန် ဆငည်း 23၊ မူစယ်
တံပ်ကညာအာဏာဆီုက်ဇေဝ်ကဲ ပ္လိူရ်ႈလေႈအမှိူဝ် ကျံရ်ဇူန် ဆငည်း 22 ဒိူန်ဒါႈ ကဲဟည်ဘိူန်းတိုည်း တိုအီးရေဲန်ဇီုင်းကာန်ကျားဖြန်နီန် 59 အီး ပကီုင်းမူစယ် ဒီကစာပ်ကုင်ခယ် – ကုင်ကပိုမ်ဘြာန် ပကပီုန်ဆျှံမ်ကဒါႇပိူည်နီန်အောႏ။
ကဲဒါႈအမှိူဝ် ကျံရ်ဇူန် ဆငည်း 22 ဘံန်ဆံန်ဒိူန် တံပ်ကညာအာဏာဆီုက်ဇေဝ်ကဲ လီပ်ယာ်ႈဟာဝ်းဖါ်ႈ ယုင်ကျားဖြန် အ်ုန်အီဂေါည်ခေဲင်ဇံင်တော်ရွက် ပကီုင်းမူစယ်နီန် ကဲဘိူန်းတိုည်းဟာဝ်း ကောန်ခယ် 2၊ ကောန်ကုင်ကပိုမ်ဘြာန် ကောန်အီမာည်း 47 ကာည်း ကောန်အီပ်ုန် 10 အီးအောႏ။
တိုအီးအရာပ်ဒီန် ကောန်အီမာည်းအူအီး က္လာင်းဒါႈ “ဆငည်းအမှိူဝ်ဒိူန်မာ် မိူဝ်ႈအေ့ဘည်လီပ်တိုည်းဟာဝ်းကဲ ခေဲင်ဇံင်းကောင်းမူလွယ်နီန်။ ခေဲင်အာရ်အိုည်ဆငည်းနီန် ကဲဂေါည်ဂေါည်တိုည်းခည်း ကျားဖြန်နီန်။ ကောန်ခယ်ပ်ုန်ဘိူန်းတိုည်းကဲမာ် မိူဝ်ႈအေ့ဘည်ႎီရ်တိုန်းကဲ ကဒါႇကုင်ခယ်နီန်”။
ဘိူန်းအယ်နံပ် ကဒါႇတံပ်ကညာအာဏာဆီုက်ဇေဝ်ကဲ ဘိူည်တောပ်ဒေတိုည်းဟာဝ်း တိုအီးကဲအီရေဲန်ဇီုင်းကာန်ကျားဖြန်နီန်မာ် ခည်ဂီုန်းအ်ုန် ဂီုည်ဆီုပ်မိူဝ်ႈဖါ်ႈ ခေဲင်ဒီန် မိုႈဒိုည်ႇအ်ုန်တောပ်ဘိုးအရာင်ပ်ုန်ဟံပ် ကညာအီမိူဝ်ႈအာဏာနီန်အောႏ။
ခည်ကျံရ်ဇူန် ဆငည်း 13 ဒိူန်မာ် တံပ်ကညာအာဏာဆီုက်ဇေဝ်ကဲ လီပ်ယာ်ႈဟာဝ်းဖါ်ႈ ယုင်ကျားဖြန်အ်ုန်အီဂေါည် ခေဲင်ဇံင်ကောင်းမူလွယ် ပကီုင်းမူစယ်နီန် ဘိူန်းဒေတိုည်းဟာဝ်း ကောန်ခယ် 17၊ ကောန်ကုင်ကပိုမ်ဘြာန်ကဲ အ်ုန်အီမိုႈကောန်အီမာည်း 34 အီး ကာည်း ကောန်အီပ်ုန် 37 အီးအောႏ။
ဘိူန်းအယ်ယိူဝ်း ဇူႈဒါခည်ဆန်ုမ် 2025 ဒိူန် ဂေါႇပ်ုန်တက်ုတ်ကုင်ခယ်နီန် တောပ်ပည်ကဒါႇ ကပီုန်ဆျှံမ်ကဒါႇပိူည် အ်ုန်အီမိုႈ ဒီကစာပ်ကုင်ကပိုမ်ဘြာန် – ကုင်ထည်းနီန် တံပ်ကညာအာဏာဆီုက်ဇေဝ်ကဲ တောပ်ဒေလီပ်ယာ်ႈဆီမ်းဟာဝ်း ယုင်ကျားဖြန်နီန်အောႏ။
ကဝ်အီကပ္လါႇဆဒါင် – လိုည်ပိုႈဆပေ
~ ~ ~
ဆဒါင်ဖုင်ယဲဆျှိည်ဖီမျေနီန် အာဝ်ႎံန်း ခေဲင် Facebook ကာည်း Website ဘိူန်းဘိုးဒီရ်ႈ၊ ဆဒံင်တငါဝ်း ခေဲင် ချှံန်နယ် ပ်ုန်ကိက်ပ္လေႈ ရခြူမ်ကဲနီန်အောႏ။
