ဇွန် ၁၃၊ ဖားကန့်
ကချင်ပြည်နယ် ဖားကန့်မြို့နယ် လုံးခင်းရပ်ကွက်(၅)မှာ ဒီနေ့ ဇွန် ၁၃ရက် မနက်ပိုင်းက လမ်းဘေးမှာ ပစ်ထားတဲ့ ပလပ်စတစ်အိတ်တစ်အိတ်ကို ကောက်ယူကြည့်ရာက ပေါက်ကွဲမှုဖြစ်ပွားပြီး ဒေသခံ အမျိုးသားတစ်ဦး သေဆုံးသွားတယ်လို့ ဒေသခံတွေဆီက သိရပါတယ်။
ဖြစ်စဉ်ဟာ ဒီနေ့ မနက် ၇ နာရီခွဲဝန်းကျင်မှာ ဖြစ်ပွားခဲ့တာဖြစ်ပြီး လုံးခင်းရပ်ကွက်ထဲက ခင်ဝင်းဝင်းချို တည်းခိုခန်းရှေ့အနီး လမ်းဘေးမှာ အမည်းရောင် ကျွတ်ကျွတ်အိတ်တစ်အိတ် တွေ့ရှိခဲ့ရာကနေ ဖြစ်ပွားခဲ့တာလို့ ဆိုပါတယ်။
“ဖိုးသမားက စားစရာထင်ပြီး သွားကောက်တာ ပေါက်ကွဲသွားလို့ အဲဒီ ဖိုး(ဘိန်းစား)သမား သေသွားတယ်။ အသွားအလာတွေ သတိထားသင့်တယ်။ လမ်းဘေးကပ်ပြီး သွားရင် အရမ်းသတိထားရမယ်” လို့ ဖြစ်စဉ်ကို သိရှိသူ ဒေသခံတစ်ဦးက ပြောပါတယ်။
သေဆုံးသူဟာ ဖိုး(ဘိန်းစား)သမားတစ်ဦးဖြစ်တယ်လို့ သိရပြီး ပေါက်ကွဲခဲ့တဲ့ အထုပ်ဟာ ထောင်မိုင်းဖြစ်နိုင်တယ်လို့ ဒေသခံတွေက ယူဆနေကြပါတယ်။
ဒေသခံတစ်ဦးကလည်း “လုံးခင်းကတော့ စစ်ကောင်စီ ထိန်းချုပ်နယ်မြေလို့ ဆိုနိုင်ပါတယ်။ အခုလို လမ်းဘေးပစ္စည်း ကောက်မိပြီး ပေါက်ကွဲတာက အရင် တောင်ပြိုဖြစ်စဉ်က ကလေးတွေ ဆော့ကစားရင်း ဖြစ်ခဲ့ဖူးပါတယ်” လို့ ပြောပါတယ်။
ဖားကန့်ဒေသမှာ အခုလို ပေါက်ကွဲမှုမျိုး အရင်ကလည်း ဖြစ်ပွားခဲ့ဖူးပြီး ၂၀၂၆ ခုနှစ် ဖေဖော်ဝါရီ ၁၃ ရက်က တောင်ပြိုကျေးရွာမှာ ကလေးငယ် ၄ ဦး ဆော့ကစားနေစဉ် မိုင်းပေါက်ကွဲမှု ဖြစ်ပွားခဲ့ရာ ၇ နှစ်အရွယ် ကလေးတစ်ဦး သေဆုံးပြီး အခြားကလေးငယ်များ ထိခိုက်ဒဏ်ရာရခဲ့ပါတယ်။
ဒေသခံတွေကတော့ လမ်းဘေးနဲ့ လူသွားလူလာနည်းတဲ့ နေရာတွေမှာ တွေ့ရတဲ့ မသင်္ကာဖွယ် အထုပ်အပိုးတွေကို မကိုင်တွယ်ကြဖို့နဲ့ သက်ဆိုင်ရာ တာဝန်ရှိသူတွေကို အကြောင်းကြားကြဖို့ တိုက်တွန်းနေကြပါတယ်။
~ ~ ~
ရွှေဖီမြေ သတင်းတွေကို Facebook နဲ့ Website အပြင် အောက်ဖော်ပြပါ ချန်နယ်တွေမှာလည်း ဝင်ရောက် ဖတ်ရှုနားဆင်နိုင်ပါတယ်။
