အလင်း၊ မေလ ၁၈ ရက်၊ ကန်ပက်လက်
ချင်းညီနောင်- CB က ၂ နှစ်ကြာ ထိန်းချုပ်ထားတဲ့ ချင်းပြည်နယ်တောင်ပိုင်း ကန်ပက်လက်မြို့ဘက် စစ်ကြောင်း ထိုးလာတဲ့ စစ်ကောင်စီတပ်ဟာ ကန်ပက်လက်မြို့နဲ့ ပိုမိုနီးကပ်လာပြီ ဖြစ်တယ်လို့ ဒေသခံတွေက ရွှေဖီမြေကို ပြောပါတယ်။
အဲဒီစစ်ကြောင်းဟာ မကွေးတိုင်း ဆောမြို့ကနေတဆင့် ပြီးခဲ့တဲ့ မေလ ၁၆ ရက်ကတည်းက စစ်ကြောင်း ထိုးတက်လာတာဖြစ်ပြီး ဒီနေ့မနက်ပိုင်းမှာတော့ ကန်ပက်လက်မြို့အနီးရှိ ၆ မိုင်အနီး ရောက်ရှိနေပြီ ဖြစ်ပါတယ်။
ဒါ့အပြင် စစ်တပ်က စစ်ကြောင်းကို ဒီနေ့ မေလ ၁၈ ရက် မနက်ပိုင်းမှာ Y-12 လေယာဉ်တစ်စီးနဲ့ လက်နက်ခဲယမ်းအပြင် ရိက္ခာတွေကိုလည်း လေကြောင်းကနေတဆင့် ချပေးနေတယ်လို့ သိရပါတယ်။
“၆ မိုင်အနားမှာ စစ်ကြောင်းတွေ ရောက်ပြီ။ မြို့နဲ့အတော်လေး နီးလာပြီ ပြောလို့ရတယ်။ ထိတွေ့မှုက မရှိသေးဘူး။ ဒီမနက် လက်နက်ခဲယမ်း အထုတ်အပိုးတွေ ချပေးသွားတယ်” လို့ ကန်ပက်လက်ဒေသခံတစ်ဦးက ရွှေဖီမြေသို့ ပြောပါတယ်။
စစ်တပ်ဟာ ပြီးခဲ့တဲ့ ရက်ပိုင်းကလည်း စစ်ကြောင်း ချီတက်ရာ လမ်းတလျှောက်ကို Y-12 လေယာဉ်နဲ့ လမ်းရှင်းပစ်ခတ်မှု လုပ်ဆောင်ခဲ့ကြောင်း သိရပါတယ်။
လက်ရှိ စစ်ကောင်စီ စစ်ကြောင်းနဲ့ ချင်းကာကွယ်ရေးတပ်တို့ ထိတွေ့တိုက်ပွဲ မရှိသေးပေမဲ့ တိုက်ပွဲဟာ အချိန်မရွေး ဖြစ်လာနိုင်တာကြောင့် လူထုတွေအနေနဲ့ လတ်တလော စစ်ရေးအခြေအနေ သတိရှိဖို့ မြို့နယ် ပကဖအဖွဲ့က တိုက်တွန်းထားပါတယ်။
စစ်တပ်ဟာ လက်လွှတ်ဆုံးရှုံးလိုက်ရတဲ့ ကန်ပက်လက်နဲ့ မင်းတပ်မြို့ကို ပြန်လည် သိမ်းပိုက်ရရှိရေးအတွက် ပြီးခဲ့တဲ့ ဧပြီလကတည်းက ဆောမြို့ကနေတဆင့် ချင်းတောင်ပိုင်းဘက် စစ်ကြောင်း ထိုးနေတာပဲ ဖြစ်ပါတယ်။
စစ်ကြောင်းမထိုးမီ ဆောမြို့ကို အသစ်ရောက်လာတဲ့ စစ်ကောင်စီတပ်ဖွဲ့ဝင်ဟာ မေလ ၁၄ ရက်က မြို့ခံလူငယ် ၁၀ ဦးထက်မနည်းကိုလည်း အကြောင်းမဲ့ ဖမ်းဆီးခဲ့ပြီးနောက် သုံးရက်အကြာ မေလ ၁၇ ရက်မှာ လူငယ်အားလုံး ပြန်လည်လွတ်မြောက်လာတယ်လို့ သိရပါတယ်။
~ ~ ~
ရွှေဖီမြေ သတင်းတွေကို Facebook နဲ့ Website အပြင် အောက်ဖော်ပြပါ ချန်နယ်တွေမှာလည်း ဝင်ရောက် ဖတ်ရှုနားဆင်နိုင်ပါတယ်။
