ဆျှိုည်ဖီမျေ၊ ကျံရ်မေ ဆငည်း 10၊ အိုမ်ငျံရ်
ယိူဝ်ႇတမိုႈဘရိက်ကားကတ်ုတ် ဂေါႇမိုႈအ်ုန်ပဲန်ဟာဝ်းအမှုအာဝ်ဆံင်တော် ခေဲင်ကီုင်းအိုမ်ငျံရ် ကပီုန်ဆျှံမ်ကဒါႇပိူည် အ်ုန်အီမိုႈဒီပ်ုန်ထိင်ခြဲအူန်း တံပ်နာန်းတအာင်းကဲ စီပဲန်ကောန်အီမာည်း ကဝ်အီဂေါည်ခေဲင်အရာပ်နီန်အူအီး ယံမ်းဖါ်ႈ 5အီးဘိူန်းဟာဝ်းဒီဆဲဝ်အောႏ။
ကောန်အီပ်ုန်ကဝ်အီယိူဝ်းဒေဲႈနီန်အူအီး က္လာင်းဒါႈ ယိူဝ်ႇတမိုႈဘရိက်ကားတာင်ကတာည်းနီန်အူကြောင် ကတ်ုတ်ဟာဝ်း ခည်ကျံရ်မေ ဆငည်း 9 ခိင်ဆံန်ကပံတ် 2နြီလေႈအူကဒည်ဒိူန် စီပဲန်အ်ုန်ငျားဒေလီပ်ဒူႈဟာဝ်း ဂါင်အီဂေါည်ရီမ်းပြော မောချယ်ရီနီန် အူကြောင်အောႏ။
“အ်ုန်ယိူဝ်ႇကဒါႇဂိုရ်နိူည် လေႈဒေဲႈ။ ဘရိက်ကားဒီန် ဟည်ကတ်ုတ်ဟောည်ႇ။ အ်ုန်ပြိုႈအေ့။ အ်ုန်ပြိုႈလေႈဆီုင်ခည်ဒီကဒိုင်း ဒါႈအ်ုန်အာဝ်ဘယ်ယာ့်ထိင်။ အီကောႈဆဲင်ကယ်ကဲမာ် အံက်ဂီုန်းခည်းပဒီနီန်။ ခံင်မိုႈတာဂျဘား (ကဝ်အီယံမ်း) နီန်ဟည်အဆာက်ဒါင်း စီပဲန်အာဝ်ဘယ်ယာ့်ဒေဒဝ်း။ အ်ုန်အာဝ်လောတ်စိ။ ဟည်တောပ်ဟာဝ်းတောပ်ကားယာ့်”
ဂေါႇဘည်အာဝ်ဆံင်တော်ဒီန် တာဂျဘားဟည်ယံမ်းဟာဝ်းဖါ်ႈ တောပ်ပည်အီကောႈကား ကောန်ဆီုက် TNLA ကဲ 3အီးကာည်း ကောန်အီမာည်း ခေဲင်အရာပ်ကဲ 2အီး ကစုကပိုမ် အီဘာတ်ဟာဝ်း ဂေါည် 5အီးအောႏ။
ဘိူန်းအယ်နံပ်မိုႈတ ကဇေန်နီး ကဲဟည်တိုည်းဟာဝ်း ကဲအီဘိူန်းဒီဆဲဝ်ကဲဒီန် ပယုင်ဆနံမ်ဒါင်း အိုမ်ငျံရ်ယာ့်အောႏ။
ဘာည်းလိူည်ဒီန် ခည်ကျံရ်အေပ်ြုရ် ဆငည်း 23 စူန်မှိူဝ်ကပံတ် 4နြီဒိူန်မာ် ကားထည်းဂီုင်အူကြောင်ကာည်း လဲင်ႏအူကြောင်လည်ကဒူႈဖါ်ႈ ခေဲင်ရဝ်ကူန်လိုင် လှံင်အေဲမ်ခြီရ် ဂေါႇဘည်ဒီန် စီပဲန်မိူဝ်ႈအေ့ ဘည်ယံမ်းဟာဝ်း ကောန်ကညောမ်ဘိူန်းအဆာက် 6ဆန်ုမ်နီန်အူအီးအောႏ။
ကဝ်အီကပ္လါႇဘေဲႇဆဒါင် – Lway N Tra
~ ~ ~
ဆဒါင်ဖုင်ယဲဆျှိုည်ဖီမျေနီန် အာဝ်ႎံန်း ခေဲင် Facebook ကာည်း Website ဘိူန်းဘိုးဒီရ်ႈ၊ ဆဒံင်တငါဝ်း ခေဲင် ချှံန်နယ် ပ်ုန်ကိက်ပ္လေႈ ရခြူမ်ကဲနီန်အောႏ။
