ရွှေဖီမြေ၊ မေလ ၈ ရက်၊ တာချီလိတ်
ရှမ်းအရှေ့ တာချီလိတ်မြို့က ရပ်ကွက်တချို့မှာ နာရီပိုင်းအတွင်းသာ မိုးကြီးခဲ့ပေမဲ့ ချောင်းနဲ့မြောင်းတွေမှာ အမှိုက်ပိတ်ဆို့မှုတွေကြောင့် ရပ်ကွက်တချို့က လူနေအိမ်ထဲ ရေတွေဝင်ခဲ့ကြောင်း မြို့ခံအမျိုးသားရဲ့ ပြောပြချက်အရ သိရပါတယ်။
မနေ့ မေလ ၇ ရက် ည ၁၁ နာရီ ဝန်းကျင်မှာ နာရီဝက်အတွင်းသာ မိုးကြီးခဲ့တာဖြစ်ပြီး ချောင်းနဲ့မြောင်းမှာ အမှိုက်တွေ ပိတ်နေတာကြောင့် ပါလျံရပ်ကွက်၊ အခါဈေးနဲ့ ပုန်းထွန်စတဲ့ရပ်ကွက်က မြေနှိမ့်ပိုင်းနေအိမ်အတွင်း ရေဝင်ခဲ့တာ ဖြစ်ပါတယ်။
မြို့ခံအမျိုးသားက “ဒီမနက် ရေကျပေမဲ့ အိမ်တွေ၊ ဆိုင်တွေထဲ အမှိုက်နဲ့ နွံ့တွေ ကျန်နေခဲ့တာ။ တချို့အိမ်တွေဆို ပစ္စည်းတွေ ရစရာမရှိတော့အောင် ပျက်စီးသွားတာရှိတယ်” လို့ ပြောပါတယ်။
တာချီလိတ်မြို့ရှိ ရေနုတ်မြောင်းနှင့် ရေချောင်းအတွင်းသို့ စည်းကမ်းမဲ့ အမှိုက်စွန့်ပစ်သူတွေကို သက်ဆိုင်ရာက အရေးယူမယ်လို့ ဆိုထားပေမဲ့ လက်တွေ့လုပ်ဆောင်တာ မရှိတာကြောင့် ရေကြီးရေလျှံမှုတွေ ဆက်ဖြစ်နေကြောင်း အထက်ပါအမျိုးသားက ဆိုပါတယ်။
ပြီးခဲ့တဲ့ ဧပြီလ ၂၉ ရက်ကလည်း မယ်ဆိုင်ချောင်း၊ နမ့်ယွန်းချောင်း၊ မဲခေါင်ချောင်း၊ နိုင်းနိုင်းချောင်း၊ (၁၂)လမ်းချောင်း၊ ခိုတောင်းချောင်း၊ ဝမ်ဟောင် ချောင်းအပြင် မြို့တွင်းရှိ ချောင်း၊ မြောင်းအတွင်းသို့ စည်းကမ်းမဲ့အမှိုက် စွန့်ပစ်မှုတွေ မလုပ်ကြဖို့ ဒေသခံတွေကိုလည်း မြို့နယ်စည်ပင်နဲ့သက်ဆိုင်ရာက သတိပေးပြောဆိုခဲ့ဖူးပါတယ်။
အလားတူ ပြီးခဲ့တဲ့ ၂၀၂၅ ခုနှစ်ကလည်း တာချီလိတ်မြို့မှာ မိုးကြီးရေလျှံမှု ဖြစ်ပွားခဲ့တာကြောင့် ဒေသခံတွေ သေဆုံးခဲ့ဖူးပါတယ်။
~ ~ ~
ရွှေဖီမြေ သတင်းတွေကို Facebook နဲ့ Website အပြင် အောက်ဖော်ပြပါ ချန်နယ်တွေမှာလည်း ဝင်ရောက် ဖတ်ရှုနားဆင်နိုင်ပါတယ်။
