သုတ၊ ဖေဖော်ဝါရီ ၁၂ ရက်၊ လားရှိုး
စစ်ကောင်စီတပ် ပြန်ထိန်းချုပ်ထားတဲ့ ရှမ်းမြောက် လားရှိုးမြို့မှာ ရှော့တိုက်ဒုံးနဲ့ ပစ်ခတ်တိုက်ခိုက်ခံရပြီးနောက် စစ်ကောင်စီတပ်က စစ်ဆေးမှုတွေ တင်းကြပ်လာတယ်လို့ လားရှိုးမြိုခံတွေနဲ့ ခရီးသွားတွေက ရွှေဖီမြေကို ပြောပါတယ်။
စစ်ကောင်စီတပ်က လားရှိုးမြို့ထဲကို ဆိုင်ကယ်နဲ့ ဖြတ်သန်းသွားလာသူတွေရဲ့ ဖုန်း စစ်တာ၊ ဆိုင်ကယ် (တူးဘောက်) ဖွင့်စစ်တာတွေ ပြုလုပ်နေပြီး ညပိုင်းမှာလည်း မသင်္ကာတဲ့ နေအိမ်တွေကို ဧည့်စာရင်း ဝင်စစ်တာတွေ ပြုလုပ်နေတယ်လို့ ဆိုပါတယ်။
လားရှိုးမြို့ထဲ ဖြတ်သန်းသွားသူတစ်ဦးက “လားရှိုးအဝင် အေတီတံတားမှာ ကားဆိုရင် ပုံမှန်ဘဲ စစ်တာ။ ဆိုင်ကယ်ဆိုရင် အိတ်ပါရင် အိတ်ထဲလည်း စစ်တယ်။ ဆိုင်ကယ်တူးဘောက်၊ ဖုန်း အကုန်စစ်တယ်” လို့ ရွှေဖီမြေကို ပြောပါတယ်။
လားရှိုးမြို့ခံ အမျိုးသားတစ်ဦးကလည်း “ရှော့တိုက်ဒုံး ကျထားတော့ လိုက်မဲနေတာ။ ဧည့်စာရင်း လိုက်စစ်နေတာ” လို့ ဆိုပါတယ်။
လားရှိုးမြို့ထဲ ရှော့တိုက်ဒုံးနဲ့ ပစ်ခတ်တိုက်ခိုက်ခံရပြီးနောက် စစ်ကောင်စီတပ်ဟာ စစ်ရေးပြင်ဆင်မှုတွေပါ လုပ်ဆောင်လာတာ တွေ့ရတယ်လို့ လားရှိုးမြို့ခံတွေက ရွှေဖီမြေကို ပြောပါတယ်။
ပြီးခဲ့တဲ့ ဖေဖော်ဝါရီ ၇ ရက် မနက် ၈ နာရီဝန်းကျင်မှာ လားရှိုးမြို့ထဲမှာ ရှော့တိုက်ဒုံး ၂ လုံး နဲ့ ပစ်ခတ်ခံရပြီး ရပ်ကွက် (၁၁) နယ်မြေ (၉) ထဲမှာ ကျရောက်ပေါက်ကွဲခဲ့ကာ လူထိခိုက် သေဆုံးတာတော့ မရှိခဲ့ဘူးလို့ သိရပါတယ်။
လက်ရှိအချိန်အထိ ရှော့တိုက်ဒုံး ပစ်ခတ်တိုက်ခိုက်တဲ့ အဖွဲ့ကို မသိရသေးဘဲ စစ်ကောင်စီလော်ဘီတွေကတော့ ဒီပစ်ခတ်မှုကို ကိုးကန့်တပ်က လုပ်ဆောင်တာလို့ စွပ်စွဲပြောဆိုနေကြတာ တွေ့ရပါတယ်။
တရုတ်နိုင်ငံရဲ့ ကြားဝင်စေ့စပ်မှုကြောင့် ကိုးကန့်တပ်မတော် MNDAA ထိန်းချုပ်ထားတဲ့ လားရှိုးမြို့ပေါ်က နေရာတွေကို ပြီးခဲ့တဲ့ ၂၀၂၅ ခုနှစ် ဧပြီလထဲမှာ စစ်ကောင်စီထံ ပြန်လည် လွှဲပြောင်းပေးခဲ့ရပါတယ်။
~ ~ ~
ရွှေဖီမြေ သတင်းတွေကို Facebook နဲ့ Website အပြင် အောက်ဖော်ပြပါ ချန်နယ်တွေမှာလည်း ဝင်ရောက် ဖတ်ရှုနားဆင်နိုင်ပါတယ်။
