မြတ်နိုး၊ ဇန်နဝါရီ ၅၊ မူဆယ်
မူဆယ်မြို့နယ်၊ နမ့်အွမ်ရွာမှာ မနေ့ ဇန်နဝါရီလ ၄ ရက်နေ့က ဒေသခံတွေရဲ့ နွားခြံတွေကို ကိုးကန့်တပ်က ဖျက်ဆီးပြီး မုံညင်းခင်းထဲကိုပါ ဆိတ်လွှတ်ထည့်နေကြောင်း ဒေသခံတွေက ရွှေဖီမြေကို ပြောပါတယ်။
“သူများ နွားခြံ ဖျက်ပစ်ပြီး သူတို့ (MNDAA) တွေရဲ့ဆိတ်က သူများရဲ့ စိုက်ခင်းကို ဆိတ်လွှတ်ကျွေးနေတယ်။ ကိုးကန့် MNDAA တွေပါ။ သူများ နွားခြံ အကုန်လုံး ဖျက်ဆီးပစ်နေတယ်။” လို့ ဒေသခံ အမျိုးသား တစ်ဦးက ပြောပါတယ်။
နွားခြံဖျက်ပြီး အဲဒီနွားခြံရဲ့ တဖက်မှာ MNDAA နဲ့ ဆက်စပ်ပတ်သက်တဲ့ လူတွေကို နေခိုင်းနေပြီး အဲဒီအနီးနားမှာ ကင်းအစောင့်တွေလည်း လာချထားနေတယ်လို့ သူက ပြောပါတယ်။
“မနေ့က အဲဒီ ပြည်သူတွေရဲ့ နွားခြံ ဖျက်ပစ်တဲ့ ကိစ္စနဲ့ ပတ်သက်ပြီး ဒီနေ့ ဇန်နဝါရီလ ၅ ရက်နေ့ မနက် သွားပြောဖို့ ဒေသခံ ပြည်သူတွေ MNDAA တွေရှိတဲ့ နေရာ ဝင်ရောက်လာတဲ့ အချိန် သေနတ် နှစ်ချက် ပစ်တယ်။” လို့ နောက်ထပ် ဒေသခံ လူငယ်တစ်ဦးက ပြောပါတယ်။
အဲကိစ္စနဲ့ပတ်သက်ပြီးတော့ ဒေသခံတွေ ကိုးကန့်တပ်ထံ သွားရောက်ဆွေးနွေးနေတယ်လို့ ဆိုပါတယ်။
အခုလို ကိုးကန့်တပ်ရဲ့လုပ်ဆောင်ရတဲ့ အကြောင်းအရင်းကိုတော့ မသိရသေးပါဘူး။
~ ~ ~
ရွှေဖီမြေ သတင်းတွေကို Facebook နဲ့ Website အပြင် အောက်ဖော်ပြပါ ချန်နယ်တွေမှာလည်း ဝင်ရောက် ဖတ်ရှုနားဆင်နိုင်ပါတယ်။
