ရွှေဖီမြေ၊ ဇွန်လ ၂၃ ရက်၊ ကွတ်ခိုင်
ကိုးကန့်တပ် ပြန်ထိန်းချုပ်တဲ့ ရှမ်းမြောက် ကွတ်ခိုင်မြို့နယ်မှာ ကျောင်းဆရာတစ်ဦးကို အမည်မသိ အမျိုးသား ၂ ဦးက သေနတ်ထောက်ပြီး ဓားပြတိုက်သွားတယ်လို့ ကိုယ်တိုင်ကြုံတွေ့ရသူနဲ့ နီးစပ်သူတစ်ဦးက ပြောပါတယ်။
ပြီးခဲ့တဲ့ ဇွန်လ ၁၅ ရက် ညနေ ၆ နာရီခွဲမှာ ကွတ်ခိုင်မြို့နယ် ခိုတင်ကျေးရွာမှာ တာဝန်ကျတဲ့ မူကြိုကျောင်းဆရာမတစ်ဦးက မြို့ကနေ ပြန်လာတဲ့အချိန်မှာပဲ ဓားပြတိုက်ခံခဲ့ရတာ ဖြစ်ပါတယ်။
“မြို့ကနေ ပြန်လာတာ။ တစ်ယောက်ထဲ ဆိုင်ကယ်စီးလာပြီး မန်ဂျက်လမ်းအကွေ့နားမှာ ဓားပြတိုက်ခံရတာ။ သူတို့နှစ်ယောက်က ပစ္စတိုသေနတ်တွေလည်း ပါတယ်။ သူတို့နှစ်ယောက်က ဆိုင်ကယ်လုတဲ့အချိန်မှာ ကျမလည်း သူတို့နှစ်ယောက်ဆီ ပြန်လုတာပေါ့။ အဲချိန်မှာ သူတို့နှစ်ယောက်က ကျမကို သေနတ်နဲ့ထောက်ပြီး လုယူသွားတာ။ ဆိုင်ကယ်က ဝယ်ထားတာ မကြာသေးဘူး။ ၃ လပဲရှိသေးတယ်” ဆိုပြီး အဆိုပါ ကျောင်းဆရာမက ပြောပါတယ်။
အဲဒီဓားပြတိုက်မှုအတွင်း ငွေ ၆ သိန်း၊ ဆိုင်ကယ်နဲ့ ဖုန်းတစ်လုံး ပါသွားခဲ့တယ်လို့ ဆိုပါတယ်။
၎င်းဓားပြတိုက်ခံရတဲ့ အဆိုပါ ကျောင်းဆရာမဟာ ကွတ်ခိုင်မြို့နယ် တုံဆင်ကြီးကျေးရွာမှာ နေထိုင်သူဖြစ်ပြီး ခိုတင်ကျေးရွာမှာ မူကြိုကျောင်းဆရာမအဖြစ် လာရောက်တာဝန်ထမ်းဆောင်တာ ဖြစ်တယ်လို့ သိရပါတယ်။
အခုလို ဓားပြတိုက်မှု ဖြစ်ပွားပြီးနောက်မှာ ကျေးရွာခံတွေ လုံခြုံရေးအတွက် စိုးရိမ်နေကြတာလို့ ပြောပါတယ်။
“အခု အဲလမ်းက တစ်ယောက်ထဲဆို မသွားရဲတော့ဘူး။ သူငယ်ချင်းတွေပါမှ သွားရဲတော့တာ။ ခါတိုင်းဆို တစ်ယောက်ထဲလည်း သွားသွားလာလာလုပ်ရဲတယ်။ အခုက အပေါ်လမ်းပဲ သွားလာနေကြတာ များတယ်” ဆိုပြီး ၎င်းက ပြောပါတယ်။
ပြီးခဲ့တဲ့ မတ်လ ၁၇ ရက်ကလည်း ကွတ်ခိုင်မြို့နယ် တက္ကနိုင်းကျေးရွာအုပ်စု ဟိုနားကျေးရွာမှာ ကိုးကန့်တပ်မတော် MNDAAက ဒေသခံတစ်ဦးရဲ့ နေအိမ်ကို ဝင်ရောက်မွှေနှောက်ပြီး ဓားပြတိုက်သွားခဲ့တဲ့ ဖြစ်စဉ်လည်း ရှိခဲ့ပါတယ်။
~ ~ ~
ရွှေဖီမြေ သတင်းတွေကို Facebook နဲ့ Website အပြင် အောက်ဖော်ပြပါ ချန်နယ်တွေမှာလည်း ဝင်ရောက် ဖတ်ရှုနားဆင်နိုင်ပါတယ်။
